Kryeministri Hoti njofton qytetarët për masat e reja kundër koronavirusit në gjithë Kosovën

Kryeministri i Kosovës, Avdullah Hoti, ka thirrur konferencë për media për të diskutuar për situatën epidemiologjike në vend, të cilën e ka cilësuar si shumë të rëndë.

“E kemi ftuar këtë konferencë për të informuar qytetarët e Kosovës me situatën epidemiologjike në vend. Situata është tepër e rëndë, kemi përgatitur edhe të dhënat që t’i shohin të gjithë qytetarët… Nuk është kjo situatë vetëm në Kosovë, por edhe në rajon e Evropë”, tha Hoti në konferencë.

Ai pohoi se Qeveria ka marrë vendim për masa të reja anti-COVID, i cili pas konferencës do të shkojë për votim në Qeveri, i dakorduar edhe me akterët e tjerë, pasi masat do të shkojnë përpara.

“Masa që vlejnë në tërë territorin, lidhen me kontrollin në hyrje-daljen në kufi, kërkesa që kemi për qytetarët e huaj të prezantojnë testin negativ PCR, reduktimi i stafit në vendin e punës, arsimi i lartë të kalojë në formën online, për atë parauniversitar vlejnë manualet nga Ministria e Arsimit. Kemi vendosur t’i kthejmë ekipet mjekësore në pikat kufitare që të kontrollojnë qytetarët që hyjnë, kemi kërku nga komunat t’i ngrisin shtabet emergjente për të mbikëqyrë personat që janë të prekur nga COVID-19 në komunat e tyre…”

Grupi i dytë i masave lidhet me komunat me rrezik më të vogël (komunat me ngjyrë të gjelbër), të mesëm (ngjyrë të portokalltë) dhe të lartë (ngjyrë të kuqe).

Kryeministri Hoti tha se shteti ka bërë riorganizimet e nevojshme brenda spitalit, duke e rritur numrin e shtretërve, numrin e shtretërve me oksigjen, gjithashtu. 

(Kosova Sot Online)