Ja kush zotohet të miratojë rritjen e tavanit të borxhit
Kryetari i Dhomës së Përfaqësuesve, Kevin McCarthy po premton të miratojë legjislacionin për të rritur tavanin e borxhit të vendit – me kusht që të kufizohen shpenzimet e ardhshme federale.
Në një fjalim të hënën në bursën e Nju Jorkut, udhëheqësi republikan sulmoi Presidentin Joe Biden për refuzimin e përfshirjes në negociatat për shkurtimin e buxhetit për të parandaluar një krizë. Zoti McCarthy tha se presidenti Biden “mungon në veprim”. Fjalimi i tij në Wall Street vjen ndërsa Uashingtoni po shkon drejt një krize fiskale mbi nevojën për të rritur tavanin e borxhit, tani në nivelin e 31 trilion dollarëve, dhe për të shmangur një pamundësi për të paguar borxhin.
Departamenti i Thesarit ka thënë se po merr “masa të jashtëzakonshme” për të mbuluar shpenzimet por se fondet do të mbarojnë në verë, transmeton gazeta “Kosova Sot Online”.
Zoti McCarthy përballet me sfidat e tij. Me një shumicë të lehtë dhe një kontroll të dobët të pushtetit, ai nuk ka qenë në gjendje të sigurojë mbështje rreth një propozimi për shkurtimin e buxhetit që mund t’i ofronte Shtëpisë së Bardhë si pikënisje në negociata.
Megjithatë, zoti McCarthy u zotua të miratojë një projekt-ligj në Dhomën e Përfaqësuesve që do të rriste kufirin e borxhit të vendit për një vit – duke e vendosur çështjen në qendër të zgjedhjeve presidenciale të vitit 2024 – duke e bashkuar atë me një plan për të rikthyer shpenzimet federale në nivelet fiskale të vitit 2022 dhe për të kufizuar shpenzimet e ardhshme në jo më shumë se 1%.
Republikanët gjithashtu duan të përfshijnë përparësitë e politikave të tyre, përfshirë shkurtimet për programet e ndihmave sociale për amerikanët më të varfër.
Shtëpia e Bardhë tha përpara fjalimit të zotit McCarthy se “fjalimi nuk është plan”, duke hedhur poshtë propozimin e tij dhe duke ripërtërirë presionin ndaj udhëheqësit republikan për të miratuar rritjen e tavanit të borxhit pa asnjë kusht.
“Ekziston një zgjidhje e përgjegjshme për kufirin e borxhit: adresimi i tij në kohë, pa pengesë apo kushte”, tha zëvendës sekretari i shtypit të Shtëpisë së Bardhë, Andrew Bates.
Dikur një çështje rutinë, nevoja që Kongresi të miratojë legjislacionin që rrit kufirin e borxhit për të vazhduar pagimin e faturave tashmë të grumbulluara, është bërë gjithnjë e më shumë një armë politike e përdorur veçanërisht nga republikanët si levë për përparësitë e politikave të tyre.
Sipas të dhënave të Departamentit të Thesarit, shpenzimet federale u rritën gjatë krizës së COVID-19, duke u arritur në 7.4 trilion dollarë në vitin 2021, përpara se të uleshin në 6.2 trilion dollarë në vitin fiskal 2022. Barra e borxhit të vendit është rritur gjithashtu në mënyrë të qëndrueshme, duke u dyfishuar gjatë administratës Xhorxh W. Bush me luftërat e epokës së 11 shtatorit dhe duke u rritur përsëri gjatë administratës Obamës, ndërsa shpenzimet u rritën dhe të ardhurat nga taksat ranë ndjeshëm gjatë Recesionit të Madh.
Vendi ka më shumë se 1 trilion dollarë deficite vjetore, dhe hera e fundit që buxheti federal u balancua ishte në vitin 2001.
(Kosova Sot Online)
