Trump kërcënon të dërgojë trupa në Baltimore
Presidenti i SHBA-ve, Donald Trump, ka kërcënuar se do të dërgojë trupa në Baltimore, duke ashpërsuar përplasjen me guvernatorin demokrat të Maryland-it, Wes Moore, i cili e kishte ftuar atë të bashkohej në një “ecje sigurie” në qytet, transmeton gazeta “Kosova Sot Online”.
“Nëse Wes Moore ka nevojë për ndihmë, ashtu si Gavin Newsom në Los Anxhelos, do t’i dërgoj ‘trupat’, ashtu siç po bëhet në Uashington DC, dhe do të pastrojmë shpejt krimin”, shkroi Trump në rrjetet sociale.
Ky është episodi më i fundit në përpjekjet e presidentit për të përdorur Gardën Kombëtare në qytetet e drejtuara nga demokratët, si pjesë e një fushate të ashtuquajtur kundër krimit.
Demokratët e kanë quajtur këtë veprim “abuzim me pushtetin”, ndërsa guvernatori Moore u shpreh se komentet e Trump “janë të shurdhëta dhe injorante”.
Trump ka vendosur tashmë rreth 2 mijë trupa në Uashington, ku sipas Shtëpisë së Bardhë janë bërë qindra arrestime. Sipas policisë metropolitane të DC, krimet e dhunshme kanë rënë ndjeshëm, duke shënuar nivelet më të ulëta në 30 vitet e fundit.
Megjithatë, presidenti ka paralajmëruar se mund të dërgojë trupa edhe në qytete të tjera si Nju Jorku dhe Çikago. Ky qëndrim ka shkaktuar reagime të forta nga drejtues demokratë, të cilët e akuzojnë Trump për përdorimin e krizës së krimit si justifikim politik.
Një sondazh i Washington Post tregon se pothuajse 80% e banorëve të Baltimore kundërshtojnë praninë e trupave federale dhe Gardës Kombëtare në qytetin e tyre.
(Kosova Sot Online)
