Ja kush thotë: VV’ja duhet të shkojë në opozitë

Deputeti i Partisë Demokratike të Kosovës, Jakup Nura, e ka quajtur paaftësi dhe mungesë guximi nga kryetari i VV-së, Albin Kurti, për krijimin e shumicës parlamentare për formimin e Qeverisë së re, transmeton gazeta "Kosova Sot Online".

Në mungesë të marrjes së përgjegjësisë ndaj popullit dhe votës së qytetarëve, Nura thotë se VV-ja duhet të shkojë në opozitë dhe të reflektojë për gabimet që ka bërë gjatë qeverisjes.

‘’Është paaftësi i tij, përderisa e ka fituar një përqindje të lartë, ai është dashur që të jetë përgjegjës dhe i vetëdijshëm për obligimet që i ka ndaj popullit dhe ndaj votës të cilën e ka marrë. Ai faktikisht shihet që nuk ka pasur ndjesinë e besimit i cili iu ka dhënë. Shumë e shëndetshme do të ishte edhe për partinë e tij LVV-në që të shkojë në opozitë dhe të reflektojë ato gabimet që i ka bërë gjatë gjithë kësaj kohe qeverisëse thuajse pesë vjeçare”, deklaroi Nura për tv 21.

Tutje ai bëri të ditur se do t’i përgjigjen pozitivisht ftesës së presidentes për takim konsultativ, por sipas tij, mungon një shumicë tjetër për formimin e Qeverisë.

“PDK-ja do t’i përgjigjet ftesës së presidentes dhe mendoj se nuk jemi të interesuar që të marrim propozimin për mandatar për arsye se nuk është edhe vullneti i LDK-së që të hyjë në një aventurë derisa nuk i kemi të sigurt se a mund t’i kemi numrat për formimin e Qeverisë. Pa dashjen time dhe të PDK-së, siç shihet zgjedhjet janë e vetmja rrugëdalje për arsye se shihet se fituesja e zgjedhjeve nuk ka pasur gatishmëri dhe guxim që të hyj në marrëveshje me parti të tjera”, tha Nura.

(Kosova Sot Online)