Shqipëria kaloi nga regjimi komunist në regjimin e drogës dhe krimit - Opinione - Kosova Sot
Shqipëria kaloi nga regjimi komunist në regjimin e drogës dhe krimit

Shqipëria kaloi nga regjimi komunist në regjimin e drogës dhe krimit

 

(Koso

Regjimi, të cilin e instaloi droga dhe krimi, është dhe përbën një kërcënim real për kombin

SHKRUAN: SKËNDER S.KAPITI

Prej këtij regjimi kriminal të narkodrogës është instaluar narkoshteti, prej krimit të drogës vjen varfëria, papunësia, moszhvillimi; dhe prej drogës burojnë dhe kriminalizohet politika e drejtësia; krimi elektoral, shitblerja e votës, krimi ordiner, aksidentet, divorcet,krimi në familje,prostitucioni, korrupsioni; biznesi i pisët, vjedhja e grabitja; parazitizmi, frika, pasiguria dhe ankthi

Droga dhe krimi janë problemet madhore me të cilat ballafaqohet sot Shqipëria , dhe se ato janë pra problemi kryesor i cili pengon zhvillimin e Shqipërisë dhe integrimin e saj në BE. Droga dhe krimi ,prej tyre kryesisht Shqipëria mbahet e izoluar dhe jashtë nga BE-ja, pasi BE nuk integron në gjirin e saj shtete të tilla prej të cilave importohet krim dhe drogë. Krimi dhe droga, si dhe korrupsioni kanë sfiduar dhe kanë kapur politikën, shtetin dhe ligjin në Shqipëri. Prandaj ndërhynë SHBA për miratimin e ligjit të VETTING-ut dhe këmbëngulin për Dekriminalizimin e politikës e cila do të mundësojë çmontimin e regjimit të drogës ,të krimit dhe të korrupsionit nga sistemi politik dhe nga drejtësia,gjendje kjo e cila mori përmasa alarmante sidomos këto vitet e fundit, në vitet 2013-2017, kur në pushtet erdhi Partia Socialiste e cila solli reaksionin zinxhir të rritjes së papunësisë, të varfërisë, të pasigurisë dhe sidomos të eksodit ku gjatë kësaj periudhe u larguan nga Shqipëria mbi 250 mijë qytetarë shqiptarë, kryesisht të rinj, të cilët kërkojnë azil ekonomik nëpër vendet e BE-së. Pra ashtu sikurse në vitet 1991 shqiptarët u larguan masivisht prej pasojave të rënda të regjimit komunist ashtu edhe sot shqiptarët largohen akoma nga atdheu por tani prej regjimeve politike të drogës, të krimit dhe të korrupsionit paskomunist.

Shqipëria si Kanabistan

Nuk ka media në Shqipëri, nuk ka lajme në televizionet në Shqipëri por edhe nga ato evropiane që pothuajse çdo ditë të mos fillojnë me drogat, me kultivimin dhe me trafikimit të tyre. Kjo ka krijuar përshtypjen e instalimit në Shqipëri të një regjimi të drogës. Kulmi arrin deri atje sa që në këtë ndërmarrje të tillë kriminale shumë të rëndë të përfshihen edhe strukturat e larta shtetërore, ku akuzohen politikanë të lartë,deri dhe ministra, kryetar komunash, dhe shefa e drejtorë policie etj. Kjo edhe për faktin tjetër pasi për trafikimin e drogës , të hashashit janë përfshirë deri edhe bazat ushtarake detare dhe ajrore të ushtrisë. Kjo tregon se droga kryesisht e ka kapur dhe e kriminalizuar sistemin, dhe lufta kundër saj duhet të shpallet si emergjencë pasi përbën një kërcënim real të madh social dhe kombëtar. Ky realitet ka mundësuar dhe inkurajuar që media prestigjioze ndërkombëtare ta etiketojnë Shqipërinë si Kanabistan. Zakonisht në botë regjimet identifikohen me atë se si qeveriset, administrohet dhe si zhvillohet e kulturohet ai vend apo shtet. P. sh. Regjimi komunist quhej i tillë sepse ndërtonte dhe funksiononte komunizmi, regjimi feudal prej feudalizmit, diktatorialët dhe autokratët prej diktatorëve dhe autokracisë etj. Eurodeputeti Kukan, drogën, që në tetor të vitit 2016 e quante: problem gjigand në Shqipëri i cili rrezikon shumë imazhin ndërkombëtar të Shqipërisë. Gjendja e drogës në vazhdimësi vetëm se e bëri akoma më shqetësues problemin në rang evropian sa që edhe Raporti i Marsit të vitit 2018 i Bordit Ndërkombëtar për Kontrollin e Narkotikëve për vitin 2017 e identifikon Shqipërinë si burimin kryesor të kanabisit që përdoret në shtetet e Bashkimit Evropian. Si pasojë e këtij realiteti problematik jo vetëm për Shqipërinë por edhe për Evropën, Shqipërinë e etiketojnë shumë personalitete të larta dhe media ndërkombëtare si Kanabistan. Kjo ndodh sepse etiketimi vjen prej kanabisit ashtu sikurse ka vende të cilat janë të njohura dhe shquhen e përmenden botërisht edhe prej asaj se çfarë ato prodhojnë, prej burimeve minerale dhe prej kulturave bujqësore që kultivojnë dhe i eksportojnë, kështu p.sh, njihen vendet e Amerikës Latine dhe të Afrikës për kakaon dhe kafenë, vendet aziatike për orizin, Amerika për grurin , shtetet e lindjes së mesme për naftën etj. Dhe, Shqipëria për fat të keq po njihet ndërkombëtarisht e shquhet aktualisht për kanabisin, për hashashin.

Droga shqiptare sot është bërë fjala më e përdorshme kudo në ambientet politike

Në regjimin komunist prioriteti kryesor i saj ka qenë bujqësia kooperativiste dhe ajo e ndërmarrjeve shtetërore, ku përparësia kryesore e atij sistemi ishin kultivimi i drithërave të bukës si gruri e misri, pasi socializmi shqiptar kishte moton e tij që: "lufta për bukën është lufta për socializmin". Tani në Demokraci zhvillohet beteja për kanabisin. Beteja për kanabisin është biznesi kryesor "kapitalist"me të cilin fitohet shpejt pasuria, investimi dhe paraja. Këtë e siguron si mundësi regjimi politik i lirisë së "demokracisë" libertariane të korrupsionit dhe i mosfunksionimit të shtetit dhe të ligjit. Me rënien e komunizmit dhe në vazhdimësi nën hijen e patronazhin e regjimeve të partive politike hyri si kulturë por edhe si edukatë kultivimi, konsumi dhe trafikim i drogës ku sot ka arritur kulmin dhe është bërë problem dhe shqetësim i madh edhe për Evropën aq sa mediat gjermane në Shkurt të vitit 2018 shkruajnë se: Shqipëria, origjina e drogës, na kanë pushtuar kartelet shqiptare" dhe po kështu Televizioni ARD në edicionin e lajmeve e cilësoi Shqipërinë si "Kolumbia e Evropës", dhe po kështu media greke në Shkurt 2018 shkruan se : Shqipëria ka prodhim rekord të kanabisit në çdo rajon dhe pothuajse në çdo fshat, dhe pra droga në Shqipëri është problem dhe shqetësim politik, diplomatik, social dhe mediatik evropian. Droga shqiptare sot është bërë fjala më e përdorshme kudo në ambientet politike, mediatike, nëpër lokale, në shoqëri dhe deri në familje., dhe jo vetëm kryefjala por ajo ka fituar edhe statusin e mjetit dhe të marifetit më të shpejtë fitimprurës dhe shikohet si një biznes kultivimi, përpunimi, trafikimi dhe eksportimi pavarësisht se ligji e ndalon dhe e ndëshkon një gjë të tillë si vepër kriminale. Mirëpo, "ligji i gjyqtarëve dhe i prokurorëve shqiptarë" , edhe ai vetë është korruptuar, blerë dhe është kriminalizuar edhe ai nga droga, nga paraja e saj dhe e korrupsionit me të ashtu si politikanët. Ky ligj ndëshkon shumë ashpër dhe rëndë ata të cilët merren me cikërrima , me sasisi të vogla të ndonjë grami droge dhe jo ata të sasive kuintalëshe dhe të tonelatave. 

Do t'u kushtojë brezave edhe në të ardhmen

Ligji sa më shumë duket sikur po e lufton drogën por çuditërisht në vend që të pakësohet droga , ajo rritet, shtrihet, përhapet dhe shtohet. Ishte vetëm në Lazarat , u duk se u lokalizua , u ndalua dhe u luftua por u rrit , u përhap dhe u kultivua kudo në fusha, fshatra, sera,kodra e male, dhe hashashi është bërë edhe vrastari e bletëve, ku vitin e kaluar prej hashashit u zhdukën gjysma e koshereve të bletëve ,pra një gjenocid ndaj bletëve. Madje droga është bërë edhe "kriter CV-je" dhe standard politik, policor dhe administrativ që të mundëson për t'u punësuar atje, pra që t'i shërbesh në regjimit. Me paratë e drogës flitet jo vetëm nga votuesi por edhe nga vetë politika se me to blihen edhe votat dhe fitohet edhe pushteti. Ky realitet e ka dëmtuar shumë rëndë në arenën ndërkombëtare personalitetin , dinjitetin dhe imazhin e shqiptarëve dhe të Shqipërisë . E si mundet që Shqipëria të integrohet në BE kur ajo është burim i kanabisit dhe ku prej Shqipërisë "eksportohen" për në BE krimi dhe droga? Prej këtij regjimi kriminal të narkodrogës është instaluar narkoshteti, prej krimit të drogës vjen varfëria, papunësia, moszhvillimi; dhe prej drogës burojnë dhe kriminalizohet politika e drejtësia ; krimi elektoral, shitblerja e votës, krimi ordiner , aksidentet, divorcet,krimi në familje,prostitucioni, korrupsioni; biznesi i pisët, vjedhja e grabitja; parazitizmi, frika, pasiguria dhe ankthi. Paraja e drogës sfidon edhe paranë e bizneseve dhe të punës së ndershme duke arritur deri atje sa që të bashkohet dhe të bashkëpunojë edhe me të. Regjimi të cilin e instalon droga është dhe përbën një kërcënim real dhe të madh për kombin, për shoqërinë shqiptare, për sovranitetin kombëtar , gjë e cila do u kushtojë brezave edhe në të ardhmen.

KRIMI DHE DROGA, SI DHE KORRUPSIONI, KANË SFIDUAR DHE KANË KAPUR POLITIKËN, SHTETIN DHE LIGJIN NË SHQIPËRI

(Kosova Sot)

7 orë e 32 minuta më parë
12/12/18