Për përfillje të përkushtuar të Kushtetutës !
Riza Smaka
Pas votimit “ për” të mocionit për mosbesimin e Qeverisë së Kosovës të adminnistruar nga z. Kurti, sipas nenit 100 par. 6 të Kushtetutës së Republikës së Kosovës, Qeveria në fjalë quhet:
në shqip :“ ... Qeveri në dorëheqje..”,
në anglisht :”... The Government is considered dismised...”
në sërbisht : “...Vlada u ostavci...”!
Fjala “ ...në dorëheqje...”, “ ...is dismised..” , “..u ostavci..”, në asnjërën gjuhë të sipërthënë, nuk përkon me institutin juridik të votimit për të mocionit të mosbesimit të qeverisë ,nga se, në rast të tillë, ekzekutivi , paraprakisht nuk ofron dorëheqje , e cila, do të ishte miratuar nga Kuvendi.
Ndaj, fjala “ në dorëheqje “ do të duhej të riformulohej :“ në detyrë” përkatësisht “ Qeveri në detyrë”.
Sipas dispozitës së nenit 82 të Kushtetutës së Republikës së Kosovës, Kuvendi i Republikës së Kosovës, mund të shpërndahet në katër raste, në tri raste obligativisht e në një fakultativisht:
Në rastin e parë ,Kuvendi ,Ius Imperativum , shpërndahet nëse brënda 60 ditësh nga dita e caktimit të mandatarit nga Presidenti i Kosovës nuk mund të formohej Qeveria,
Në rastin e dytë, nëse për shpërndarje të Kuvendit do të votonte sëpakut 2- 3 e të gjithë deputetëve ,
Në rastin e tretë, nëse brënda afatit prej gjashtëdhjetë ditësh, nga dita e fillimit të procedurës së zgjedhjes , nuk do të zgjedhej Presidenti i Republikës së Kosovës si dhe,në rastin e katërt, qe i referohet situatës politike aktuale, Kuvendi , Ius Dispositivum, do të m u n d të shpërndahej nga Presidenti i Kosovës pas votimit të sukseshëm të Qeverisë!
Sëandejmi, përderisa në tri rastet e sipërthëna , të përcaktuara me dispozitën e nenit 82 par. 1 alinesë 1, 2 dhe 3 të Kushtetutës, Kuvendi i Republikës së Kosovës ,do të shpërndahej Ius Imperativum , në rastin e katërtë të përcaktuar me dispozitën e nenit 82 paragrafin 2 të Kushteutës, Kuvendi i Republikës së Kosovës ,Ius Dispositivum, Kuvendi do të mund të shpërndahej por edhe do të mund të mos shpërndahej , varësisht nga vlerësimi diskrecional i Presidentit të Kosovës.
Sikundër të përcaktohej për shpërbërjen e Kuvendit , Presidenti Ipso Iure, do t’i shpallte zgjedhjet e përgjithshme të parakohshme.
E drejta diskrecionale e tillë , implicite , i është dhënë Presidentit për të aplikuar shpërndarjen e Kuvendit ,varësisht nga rrethanat socio- ekonomike, politike , shëndetësore , klimatike ( vjeshta e vonë, dimri, pranvera e hershme) ,afati i shkurtër për mbajtjen e zgjedhjeve të përgjithshme të jashtëzakonshme dhe të rregullta ( bj. fj., brënda gjashtë muajve nga kërkesa për mbajtjen e zgjedhjeve të përgjithsme të parakohshme do të duhej mbajtur zgjedhjet e përgjithsme të rregullta) si dhe nga faktorë të mbrojtjes dhe sigurisë së vendit përkatësisht të qytetarëve.
Mbase, referuar gjendjes shëndetërore të jashtëzakonshme të pandemisë globale , në të cilat ndodhet vendi ynë, Presidenti i Kosovës ka optuar për të mos e shpërndarë Kuvendin e Republikës së Kosovës.
Dispozita në fjalë ,nuk e përmend dot statusin as mandatin e Qeverisë në Dorëheqje, për ç’shkak, Contradictio In Adiectio, Qeveria në Dorëheqje , përderisa nuk egziston dispozitë e Kushteutës as eligjore ( madje, kryesisht nga motive korruptive ,nga shpallja e Pavarësisë së Kosovës , nuk egziston dot Ligji për Qeverinë – sic ) për kufizimin eventual të autorizimeve për shkak të votimit të mocionit për mosbesimin e saj , deri në formimin e Qeverisë sipas rezultateve të zgjedhjeve të përgjithshme , e njëjta do t’i ushtrojë funksionet të stipuluara me dispozitën e nenit 93 dhe 94 të Kushtetutës së Republikës së Kosovës!
Aq më parë kur, përkitazi me statusin dhe mandatin e Qeverisë në Dorëheqje për shkak të votimit të sukseshëm të mocionit për mosbesimin e saj , në Kushteutën aktuale të Republikës së Kosovës ,nuk egziston asnjë paragraf as aline me të cilën do të përcaktohej kufizimi i autorizimeve kushtetuese as kërkesa për riformimin e Qeverisë në vijim.
Konkretisht, neni 95 i Kushtetutës, me asnjë paragraf as aline nuk e trajton statusin as poststatusin e Qeverisë në Dorëheqje.
Përkundrazi , dispozita e nenit 95 par. 1,2,3 dhe 4 e Kushtetutës e rregullon procedurën për formimin e Qeverisë pas zgjedhjeve të përgjithshme të rregullta apo të parakohshme pra jo edhe pas votimit të mocionit të mosbesimit të saj!
Ndërkaq ,dispozita e nenit 95 par. 5 të Kushtetutës , në të cilën , gabimisht , adresohet Presidenti i Republikës së Koosvës tok me opozitën parlamentare dhe me liderët e subjekteve politike parlamentare , explicite, i referohet procedurës për formimin e Qeverisë në vijim nëse,
Kryeministri jep dorëheqje, ose kur për arsye të tjera,
Posti i Kryeministrit mbetët i lirë!
Sikundër dihet dhe shihet dhe, me asgjë nuk mund të kontestohet,
Kryeministri aktual z. Albin Kurti , nuk ka dhënë ,madje, nuk e ka ndërmend të jep dorëheqje, por, është i përcaktuar për të vepruar e punuar me përkushtim në zbatimin e ligjit dhe të shtetit të së drejtës si dhe,
Nga asnjë arsye , posti i Kryeministrit nuk ka mbetur i lirë , përkundrazi, është i plotësuar legjitimisht dhe legalisht.
Sëandejmi , në rastin e Qeverisë në Dorëheqje , sipas Kushtetutës, në përgjithësi e ,veçanërisht, sipas dispozitës së nenit 95 të Kushteutës , nuk do të mund të procedoheshin dot konsultime as nuk do të mund të ndërmerrëshin veprime për riformim të Qeverisë, nga se , nuk egziston asnjë bazë kushtetutare as ligjore !
Ndryshe , vendin tonë, në bazë të eksperiencave të deritanishme , sipas të cilave , në vend të interpretimeve juridike - logjike, sistematike, gjuhësore e dogmatike , por , jo rrallë herë ,konform me dofarë mendimesh dhe opinionesh , të cilat ,askund dhe asnjëherë nuk konsiderohen burime juridike, nëse në këtë apo atë mënyrë do të impozicionohej aplikimi i nenit 95 par. 5 të Kushtetutës, sipas tij, atëherë ,subjekti politik fitimtar në zgjedhje të përgjithshme përkatësisht Lëvizja Vetëvendosja do ta kishte autorizimin ekskluziv për të propozuar kandidatin për mandatar për formimin e Qeverisë, në një anë dhe,nga shkaku i egzistimit të vakumit juridik ( Gape in Law) , përkitazi me afatin prekluziv për të propozuar kandidatin për mandatar, nga dita e votimit të sukseshëm të mocionit për mosbesimin e Qeverisë , koincidentalisht , sikundër e drejta diskrecionale e Presidentit nga dispozita e nenit 100 par. 2 të Kushtetutës për të shpërberë apo për të mos e shpërbërë Kuvendin, në këtë rast ,rezulton e drejta diskrecionale e Kryeministrit për ditën e propozimit të kandidatit për mandatar për formim të Qeverisë! Aq më parë kur ,vendi ynë ndodhet në rrethana të jashtëzakonshme ...to be or nor to be...të pandemisë globale si dhe ,afati inegzistent prekluziv nga nenin 95 par. 5 i Kushtetutës , nuk mund të krijohet me konsultime , opinione, mendime as me qendrime politike, por ,vetëm me amendment në atë dispozitë ,të miratuar në procedurë legjislative dhe të promulguar nga Presidenti i Kosovës.
Aktualisht , jo pak persona thirren në Gjykatën Kushtetutëse për të zgjidhë këtë konfuzitet artificial politik !
Gjykata Kushtetutëse, sikundër dihet , nuk është e autorizuar për të krijuar normë juridike ,por, për të interpretuar normën juridike të kontestuar ,ndaj , për hir të postulateve të shtetit të së drejtës dhe të sundimit të ligjit në aplikim “ Dura Lex Sed Lex” ,me bazë do të mund të pritej qe , sëpakut, këtu e tutje , të veprojë sipas autorizimeve , ashtu që, rastet juridike problematike t’i interpretojë juridikisht sipas metodës dogmatike, gjuhësore, sistematike, logjike, tërësisht apolitikisht veçanërisht jashtë influencimeve të politkave ditore, jo rrallë herë , tejet banale e vullgare.
Përfundime dhe propozime
Qeveria në Dorëheqje , ndodhet në detyrë dhe është e autorizuar për t’i ushtruar funksionet e veta përderisa, me asnjë dispozitë juridike, nuk i janë kufizuar autorizimet e përcaktuara me dispozitat e neneve 93 dhe 94 të Kushtetutës, për ç’shkak , mbetët t’i ushtrojë funksionet e veta deri në formimin e Qeverisë nga zgjedhjet e përgjithshme të parakohshme apo të rregullta.
Qeveria në Dorëheqje mbetët në funksion të ekzekutivit deri në formimin e Qeverisë nga zgjedhjet e përgjithshme të parakoshme,
Zgjedhjet e përgjithshme të parakohshme të shpallen pas kalimit të pandemisë globale nga vendi ynë dhe,
Presidenti i Republikës së Kosovës ,sipas nenit 84 par. 1 al. 8 të Kushtetutës , apo, Qeveria e Kosovës, sipas nenit 93 par. 1 al.9 të Kushtetutës, t’i propozojë apo t’i propozojnë Kuvendit të Republikës së Kosovës amendment në nenin 82 par. 2 të Kushtetutës përkatësisht në nënin 95 par. 5 të Kushtetutës referuar statusit e mandatit të ardhshëm të Qeverisë në Dorëheqje si dhe afatit për propozimin e kandidatit për mandatar pas zgjedhjeve të përgjithshme , votimit të sukseshëm të mocionit për votëbesimin si dhe për mosbesimin e Qeverisë!
Prof dr Riza Smaka
Shkrimet në këtë rubrikë nuk shprehin qëndrimet e gazetës "Kosova Sot Online"