Në qiellin e Floridës vërehet një fenomen unik

Një formë e rrallë e shkarkimit elektrik (vetëtimës) e cila, në vend se të bjerë poshtë, lëviz lart, është regjistruar me kamerë nga shkencëtarët. Ajo që është interesante, është fakti se, që të tri llojet e këtij fenomeni, që dihet se ekzistojnë, janë parë në këtë rast. Ky studim, i bërë nga një ekip i Institutit të Teknologjisë në Florida, është publikuar në revistën "Nature Communications".

Gjithsej janë vërejtur shtatë shkarkime elektrike të tilla, secila me një "nënshkrim" unik optik. Gjatë dimrit dhe stuhive me borë, shkarkimet e tilla elektrike mund të fillohen nga objektet e larta. Por, këto shkarkime elektrike janë tepër të rralla, më pak se 1% nga të gjitha vetëtimat. Pra, kemi të bëjmë me një vetëtimë, e cila udhëton nga poshtë (toka, ndonjë objekt), kah qielli. Dr. Ningyu Liu thotë se vetëtimat e tilla bartin një sasi të madhe të ngarkesës elektrike në shtresat e epërme të atmosferës.

(Kosova Sot Online)