Feronikeli e mund Lirinë dhe merr kreun e Superligës
Feronikeli e ka marrë kreun e Ipko Superligës së Kosovës, pas triumfit bindes kundër Lirisë të hënën në Prizren.
Humbja tronditëse e liderit të deritanishëm, Prishtinës, kundër Flamurtarit në kryeqytet, nënkupton se klubi nga Drenasi tani është lider i Ipko Superligës me dy pikë më shumë se bardhekaltrit.
Pjesa e parë në stadiumin “Përparim Thaqi” në Prizren qe e mjaftueshme për vizitorët nga Drenasi për t’i marrë tri pikë kundër Lirisë.
Kastriot Rexha realizoi dy herë për triumfin e Feronikelit. Shtatë minuta brenda takimit, Rexha realizoi falë një asisti nga Përparim Islami.
Dy minuta para fundit të pjesës së parë, Rexha e dyfishoi epërsinë dhe i siguroi kreun Feronikelit.
Feronikeli është lider i ri i Superligës me 42 pikë, dy më shumë se Prishtina.
Liria, ndërkohë, renditet e 10-ta me 19 pikë, tri më pak se Trepça '89 në vendin e nëntë.
(Kosova Sot)