Majlinda Kelmendi kualifikohet në çerekfinale të Grand Slamit të Gjermanisë
Kampionia Olimpike, Majlinda Kelmendi, e ka siguruar një vend në çerekfinalet e Grand Slamit të Dusseldorfit, në Gjermani.
Majlindja e mposhti, në rundin e tretë, xhudisten braziliane, Eleudis Valentim, me ippon, në kategorinë e peshave -52 kilogramëshe. Me këtë fitore, kosovarja i afrohet medaljes së dytë të artë për këtë vi.
Në rundin e dytë, kosovarja e mposhti xhudisten gjermane, Verna Thumm, po ashtu me ippon, ndërsa e kaloi rrethin e parë pa luftë.
Në çerekfinale, Majlinda do të përballet me xhudisten koreane, Bokyeong Jeong.
Kjo është gara e dytë e xhudos në të cilën Kelmendi po merr pjesë këtë vit, pasi që pushoi në Grand Slamin e Parisit. Në garën e parë, në Grand Prixin e Tel Avivit, ajo e kishte fituar medaljen e artë.
Majlinda është garuesja e vetme që po e përfaqëson Kosovën, pasi xhudistët tjerë, Akil e Nora Gjakova, Distria Krasniqi dhe Loriana Kuka, pushuan.
Këtë formë të mirë, xhudistja pejane do të tentojë ta shfaqë edhe në ndeshjet e radhës, në Grand Slamin e Gjermanisë, ku marrin pjesë 683 garues nga 97 shtete. Grand Slami është i vlefshëm për pikë Olimpike Tokio 2020.
(Kosova Sot)