Milaim Rama, inspirimi i Behramit, Shaqirit e Xhakës
Milaim Rama është futbollisti i parë nga Kosova që ka luajtur në Përfaqësuesen e Zvicrës. Ish-sulmuesi i njohur shqiptar e ka rrëfyer eksperiencën e tij tek Helvetikët, 16 vjet pasi e kishte marrë pasaportën zvicerane
Ishte 15 prilli i vitit 2003, fiks 16 vjet më parë kur Milaim Rama e kishte marrë pasaportën zvicerane
Pak më vonë, ai ishte bërë pjesë e Kombëtares së Zvicrës.
Tash, kur kthehet prapa, ish-sulmuesit të rrezikshëm i duket si një ëndërr e bukur, të cilën e shijoi në maksimum.
“Është absolutisht një mrekulli”, thotë Rama.
Edhe mediat zvicerane shkruajnë se ekipi kombëtar i Zvicrës do të ishte vështirë të imagjinohej pa futbollistë shqiptarë, pasi aty janë Granit Xhaka e Xherdan Shaqiri, por edhe Admir Mehmedi e Blerim Xhemaili, derisa deri vjet ishte edhe Valon Behrami.
Futbollistë këta që e luajnë rolin kyç tek ekipi i Vladimir Petkovicit.
E para tyre ishte Milaim Rama, i cili pati ngritje të mrekullueshme në karrierë dhe zhvilloi 7 ndeshje me ZVicrën.
Ai kishte shkuar në këtë shtet në vitin 1993, ishte 17 vjeç dhe kurrë nuk kishte luajtur futboll në ndonjë klub.
Skuadra e tij e parë ishte FC Interlaken, kur Milaimi e shtypi butonin, në ligën e pestë zvicerane.
“Pas kësaj, gjithçka shkoi shpejt. Ishte si një mrekulli”, thotë Rama, duke e kujtuar atë kohë.
Thuni e kishte transferuar atë kur ishte bërë 21 vjeç.
Me trajnerin e ri, Hanspeter Latour, Rama kishte shkëlqyer në fillimvitet e 2000-ta duke realizuar 25 gola me Thunin në kampionatin zviceran.
Ai pa dyshim është njëri prej legjendave të Thunit.
Hapat e tij vazhduan në divizionin e parë zviceran dhe më pas shënoi 20 gola.
Më pas, trajneri Kobi Kuhn e kishte thirr në Kombëtare, katër muaj pasi Rama e kishte marrë pasaportën zvicerane.
“Unë e fitova një vend në skuadër falë golave të mi. Unë isha 10 vjet prapa shokëve të skuadrës pasi kisha nisur të luaja vonë futboll. Unë megjithatë e bëra të pamundurën të mundur dhe i bëra të gjithë shqiptarët krenarë”, thekson tutje Rama.
Ai ishte ftuar në Kampionatin Evropian 2004 dhe kishte luajtur 5 minuta në ndeshje me Francën.
“I jam shumë mirënjohës trajnerit Kobi Kuhn që më bëri lojtar të Kombëtares së Zvicrës”, shprehet Rama.
Ai më pas e pati një eksperiencë në Gjermani me ekipin Augsburg, por aty nuk e gjeti sa duhet veten.
Pastaj e kaloi një sezon në ekipin zviceran, FC Schaffhausen.
“Nuk jam pishman dhe nuk më mbetet merak që mbeta pa luajtur në Ligën e Kampionëve. Jam pishman vetëm që i humba nervat dhe pas një viti e shkëputa kontratën me Augsburgun”, nënvizoi Rama, i cili u rikthye në Thun në vitin 2006, ku qëndroi deri në vitin 2012.
Sot, ish sulmuesi kosovar jeton në kantonin e Aargau dhe punon në industrinë e sigurimeve.
(Kosova Sot)