Penalltia e pritur ndaj West Hamit ishte e para pas plot 5 vjetëve për De Gean

  • G.G /
  • 20 shtator 2021 - 14:27
Penalltia e pritur ndaj West Hamit ishte e para pas plot 5 vjetëve për De Gean

Rikthimi i De Geas, heroit të ditës në sfidën me West Hamin. Manchester United e ka kapërdirë me vështirësi zhgënjimin që humbi Europa League-n në finale me Villarealin, mbi të gjitha për mënyrën se si erdhi disfata.

Spanjolli ka qenë për një kohë të gjatë në shënjestrën e tifozëve të “Djajve të kuq”, në bankën e akuzës, pasi nuk ia doli të priste asnjë nga 10 penalltitë, duke humbur dhe atë që gjuajti vetë. Me pak fjalë, nuk ndryshoi dot asgjë, as me këmbë, as me duar.

Në Angli ishte një paraqitje që nuk kaloi pa rënë në sy. Madje, pak kohë më parë, tabloidi “The Sun” i bëri një analizë të pamëshirshme. Spanjolli kishte pritur penalltinë e tij të fundit më 23 prill të 2016-ës dhe që atëherë nuk ka mundur të shpëtojë asnjë.

Kaq u ka mjaftuar tabloidëve, për të stiluar krahasimin klasik, çfarë kohësh ishin kur portieri i United kishte pritur penalltinë e tij të fundit, atë ndaj Lukakut, në ndeshjen e gjysmëfinales së FA Cup me Evertonin, 5 vjet më parë.

Atëherë Barack Obama ishte ende president i SHBA, Anglia ishte ende pjesë e Bashkimit Europian, Angelina Jolie e Brad Pit ishin ende një çift i lumtur dhe Roy Hodgson ishte trajner i Anglisë.

E bukura e futbollit është se të jep gjithmonë një tjetër shans dhe ai i De Ge-as erdhi në sekondat e fundit, në sfidën mes United dhe West Hamit. “Djajtë e Kuq” ishin në avantazh 2-1 falë golave të Ronaldos dhe Lingardit.

Te pika e bardhë, enkas për të gjuajtur penalltinë shkoi një specialist si Noble. De Gea ia doli të priste penalltinë, diçka që nuk ndodhte prej plot 5 vitesh.

(Kosova Sot Online)