Xavi ndan mendjen për transferimet e janarit

Xavi Hernandez ka nisur punën me skuadrën e tij të re, Barcelonën dhe trajneri i ri ka nisur të mendoj që tani për ndryshime në skuadër dhe në formacion. Ish-kapiteni i katalanasve nuk është për pushime në Barcelonë dhe këtë ua ka bërë me dije drejtuesve.

Në zyrat e klubit, Xavi, ka prezantuar tre emrat që ai i dëshiron që në merkaton e dimrit dhe bëhet fjalë për, Raheem Sterling, Dani Olmo dhe Dani Alves. Natyrisht nuk do të jetë aspak e lehtë, por drejtuesit po mendojnë për një sforcim ekonomik, sepse kufiri i pagave nuk e lejon klubin të jetë shumë aktivë në merkato. Gjithsesi, Sterling dhe Dani Olmo do të ishin transferime në formë huazimi me opsion blerjeje, ndërsa Dani Alves do të ishte diçka e thjeshtë. Natyrisht që mosha e brazilianit mund të jetë problemi i vetëm, por 38-vjeçari e ka shprehur hapur se ai është i gatshëm të ndihmojë Xavi-n dhe Barcelonën në një moment të tillë.

Sterling mund të konsiderohet një opsion i mundshëm sepse anglezi është jashtë planeve të Guardiolës dhe marrëdhëniet janë krisur prej kohësh me sulmuesin që ka kërkuar largimin. Barça e pret krah hapur dhe për Sterling do të ishte një destinacion i rëndësishëm. Në krahun tjetër qëndron Dani Olmo. Për të arritur te spanjolli nuk do të jetë aspak e lehtë, pasi Olmo është një lojtar i rëndësishëm për Leipzig, por ai ka shprehur dëshirën për të ndryshuar ambient dhe ka kërkuar largimin në verën e ardhshme, por dëshira e tij mund të bëhet realitet që në janar, nëse Leipzig dhe Barcelona do të gjejnë gjuhën e përbashkët.

Drejtuesit e Barcelonës kanë filluar të lëvizin, kontaktet e para kanë nisur dhe kjo ka ngrohur edhe Xavi-n i cili sipas mediave spanjolle jo vetëm ka piketuar lojtarë për të përforcuar skuadrën, por edhe ata të cilët do të largohen, duke treguar se epoka Xavi sapo ka nisur.

(Kosova Sot Online)