Ish-mbrojtësi i Man Utd në prova te Como

Timothy Fosu-Mensah, ish-mbrojtësi i Manchester United, aktualisht është në provë me ekipin e ri në Serie A, Como, që po monitoron ecurinë e tij me mundësinë për ta nënshkruar si lojtar të lirë gjatë merkatos së transferimeve.

Fosu-Mensah u rrit në akademinë e famshme të United dhe debutoi në Premier League nën drejtimin e Louis van Gaal në një fitore 3-2 ndaj Arsenalit në shkurt të vitit 2016.

Pas largimit të van Gaal nga Old Trafford, mundësitë e Fosu-Mensah për të luajtur në ekipin e parë të United u bënë të rralla, dhe ai u dërgua në huazim te Crystal Palace për sezonin 2017-18, ku bëri 21 paraqitje në ligë.

Ai më vonë luajti për Fulham në një marrëveshje të ngjashme huazimi sezonin pasues. Në verën e vitit 2021, ekipi nga Bundesliga, Bayer Leverkusen, e mori nën kontratë holandezin, por karriera e tij më pas u godit nga disa dëmtime serioze.

Një këputje e ligamentit gjatë sezonit të tij të parë në Gjermani, dhe më pas një dëmtim i rëndë në muskujt e pasëm të kofshës gjatë një ndeshjeje në Europa League në vitin 2022.

Si rezultat i atyre dëmtimeve, Fosu-Mensah nuk bëri asnjë paraqitje konkurruese sezonin e kaluar, ndërsa shokët e tij të ekipit shkuan drejt fitimit të titullit në Bundesliga pa humbur asnjë ndeshje.

Tani, pasi kontrata e tij me BayArena ka skaduar, Como mund t’i bëjë 26-vjeçarit një ofertë nëse impresionohen me paraqitjet e tij në stërvitje.

Como tashmë ka shtuar disa emra të njohur nga Premier League në skuadrën e tyre këtë verë, përfshirë ish-mbrojtësin e Manchester United, Raphael Varane, dhe veteranët e Liverpoolit, Pepe Reina dhe Alberto Moreno.

(Kosova Sot Online)