Christensen flet rreth rinovimit me Barcelonën

Vera e ardhshme mund të sjellë largime të rëndësishme nga Barcelona, pasi disa lojtarë të ekipit të parë pritet t’i japin fund qëndrimit të tyre në klub. Marc-André ter Stegen nuk shihet më si pjesë e planeve afatgjata, ndërsa Robert Lewandowski nuk pritet të marrë ofertë për rinovim përpara se t’i skadojë kontrata në fund të këtij sezoni.

Një tjetër lojtar që e ka kontratën në skadencë në qershor është Andreas Christensen. 29-vjeçari ka qenë një element i besueshëm sa herë që është aktivizuar që nga transferimi i tij nga Chelsea në vitin 2022, por problemet e shpeshta me dëmtimet e kanë lënë pas në hierarkinë e mbrojtjes – dhe kjo mund të ndikojë që Barcelona të mos i ofrojë një kontratë të re.

Megjithatë, Christensen nuk duket i shqetësuar për të ardhmen e tij, siç tregoi në një intervistë për Tipsbladet (përmes Marca):

“Mendoj se jemi në një situatë të mirë dhe nuk ka asgjë që mund të ndryshojë mënyrën se si e përjetoj jetën çdo ditë. Sigurisht, do të doja ta dija se çfarë do të ndodhë, por nuk është diçka që ndikon në humorin tim apo në bisedat tona të përditshme.”

Christensen pranoi se nuk e di nëse Barcelona ka ndërmend t’i ofrojë rinovim, por theksoi se dëshira e tij është të qëndrojë në Kataloni edhe për një apo dy vite të tjera.

“Jo, ende nuk kam ndonjë ndjesi për këtë – jo tani. Dua të përqendrohem në skuadër dhe të luaj sa më shumë që të mundem. Shpresoj të qëndroj, por për momentin po e marr çdo gjë siç vjen. Nëse ka diçka për t’u bërë, agjenti im do të kujdeset për këtë. Sigurisht që dua të di çfarë po ndodh, por për momentin përqendrohem vetëm në atë që mund të bëj vetë. Nuk kam plan B.”

Mbetet për t’u parë si do të zhvillohet situata e Christensenit, por edhe nëse nuk i ofrohet mundësia për të vazhduar me Barcelonën, ai mund të mbetet në La Liga duke iu bashkuar një klubi tjetër.

(Kosova Sot Online)