Rrëfimi rrëqethës i Besarta Jasharit për betejën e 5, 6 dhe 7 marsit

Besarta Jashari, bija e heroit Hamëz Jashari e ka ritreguar historinë legjendare të 5, 6 e 7 marsit, ku forcat serbe hynë në Prekaz, duke vrarë kështu të gjithë anëtarët e familjes së saj, përfshirë edhe komandantin Adem Jashari.

Me anë të një postimi në Facebook, Besarta Jashari e ka filluar rrëfimin e saj me plumbin e parë të shkrepur nga familja Jashari në drejtim të forcave serbe.

Rrëfimi vazhdon me plumbin e fundit, që u shkrep nga Kushtrim Jashari.

Ajo në rrëfumin e saj pyet veten, “a ngela vetëm?”.

Ky është postimi i plotë, pa ndërhyrje i Besarta Jasharit:

Betejën e 5, 6 dhe 7 Marsit, e nisën Fitimi e Besimi, duke ndezë flakën e lirisë e cila ndriçoj rrugën e UÇK-së deri në liri…

Plumbin e fundit e shtiu në forcat serbe vet Kushtrimi… edhe Kushtrimi i balit Adem më la.

NGELA VETËM APO JO?!

Isha e rrethuar me zjarrë e tym, më shoqëronin motrat e çikat e axhallarëve – por ato nuk flisnin, as nana nuk më fliste… dikur tymi u largua… dhe e pashë dhe u binda se

NGELA VETËM.

As Blerina nuk ishte me mua më… si asnjëherë më parë kisha nevojë të zgjohesha nga ëndrra, por ajo nuk ishte ëndërr… së paku kisha nevojë, për një njëri që t’më gënjejte ëmbel… e kotë

NGELA VETËM

Pa asnjë frikë, krenare me Jasharët e mi ecja rrugës nga shtëpia drejtë fabrikës së municionit që dikur ishte rruga ime për në shkollë… i pashë serbët, ishin të trishtuar, si duket plumbi i babës Shaban, balit Adem e babushit kishin shpaguar breza e breza.

Dhe kështu, ishte ajo ditë që zjarri i Kullës tonë u bë zjarrë për pushtuesin dhe shkëndi lirie për ne.

ÇDO GJË FILLOJ TË KISHTE KUPTIM

Besimi e Fitimi e nisën, sepse besonim të fitonim, ndërsa Kushtrimit e mbyli betejën e u bë kushtrim gjithëkombëtar për liri.

Atëherë edhe pushoj kënga “për mëmëdheun” e nisi “marshi i UÇK-së”

SOT

Nuk jam vetëm, e kam mixhën Rifat, vëllaun Bekimin dhe të tjerët, që kanë bërë që Kulla jonë të qëndrojë edhe më e fortë.

Kam Valonin, Dylin e Nolin që plotësojnë jetën time.

Ju kemi edhe juve popull anë e mbarë trojeve etnike shqiptare, që çdo herë kemi qenë bashkë.

Urime festën e lavdisë kombëtare
Gëzuar Epopeja e Ushtrisë Çlirimtare të Kosovës.

(Kosova Sot Online)