Erdogani i padit redaktorët e gazetës greke për shkak se vendosën një titull kundër tij

Presidenti i Turqisë, Rexhep Taip Erdogan ka ngritur padi kundër redaktorëve të gazetës greke, “Dimokratia”, për shkak të titullit të faqes së parë të gazetës të premten.

Lajmi kryesor në faqen e parë të gazetës “Demokratia” mbante një ofendim ndaj Erdoganit në gjuhën turke, ku shkruhej “Siktir git Mr. Erdogan”, ndërsa te fotoja e presidentit turk ishte edhe mbishkrimi “F*ck you”.

Të premten, ambasadori grek në Turqi u thirr për të dhënë shpjegime mbi këtë çështje, siç u njoftua nga ministri i Jashtëm i vendit, Mevlüt Cavusoglu.

Ministria e Jashtme greke e kishte dënuar botimin me një deklaratë, duke nënvizuar si vijon: “Liria e shprehjes dhe liria e shtypit janë plotësisht të garantuara në Greqi. Ky fakt nuk e mohon detyrimin për të abstenuar nga fyerjet ndaj ndonjë personi, aq më tepër ndaj udhëheqësve të huaj. Përdorimi i shprehjeve fyese është i dëmshëm për kulturën politike të vendit tonë dhe i dënueshëm”.

Konflikti turko-grek vijon prej kohësh për kufirin detar në Mesdheun lindor, ndërsa as ndërhyrja e NATO-s për t’i ulur palët dhe tentativat nga SHBA-ja dhe Gjermania nuk kanë mundur që t’i ulin tensionet ndërmjet dy vendeve.

(Kosova Sot Online)