Berisha: Haradinaj i duhuri për President

  • A.P /
  • 22 janar 2021 - 16:45
Berisha: Haradinaj i duhuri për President

Ish- kryeministri i Republikës së Shqipërisë, Sali Berisha, ka thënë se Ramush Haradinaj ka dëshmuar burrëri edhe në detyrë, por edhe në fatkeqësi.

Berisha ka thënë se kur udhëheqësit serbë fshiheshin në vrima miu nga drejtësia ndërkombëtare, Haradinaj dha dorëheqjen nga pozita e kryeministrit dhe u nis për në Hagë.

“Pa ndërhy kategorikisht në asnjë lloj posti, Ramush Haradinaj mund të them se ka atribuuar dinjitet dhe burrëri edhe në detyrë, por edhe në fatkeqësi. Mos harroni një moment, 15 vjet më parë Haradinaj ishte kryeministër dhe e kërkuan në Hagë, ai dha dorëheqjen dhe u nis drejt Hagës në një kohë kur udhëheqësit serbë që kërkoheshin nga drejtësia ndërkombëtare futeshin në vrima të miut”, ka thënë Berisha.

Ish-kryeministri shqiptar ka kujtuar edhe deklaratën e presidentit amerikan në atë kohë, Bush, i cili përmes një deklarate ka vlerësuar qëndrimin dinjitoz të Haradinajt.

“Jo vetëm shqiptarët që u ndienë krenarë, por në atë kohë mbaj mend si sot kur presidenti amerikan Bush bëri një deklaratë nga Shtëpia e Bardhë për qëndrim dinjitoz të kryeministrit Haradinaj. Kështu që, unë nuk jam për të përcaktuar çfarë funksionesh dhe postesh, por unë mund të them se Haradinaj ka mbajtur qëndrime dinjitoze në të gjitha rrethanat e karrierës së tij”, është shprehur Berisha.

(Kosova Sot Online)