Grasso: NATO s’do ta lejojë kurrë kthimin e ushtrisë serbe në Kosovë
Serbia mund të t’i kryejë vetëm 4 funksione sipas Rezolutës 1244 të Këshillit të Sigurimit të OKB-së, ka deklaruar ish-zëdhënësi i KFOR-it, Vincenzo Grasso, transmeton gazeta "Kosova Sot Online".
Grasso tha se asnjëra nga funksionet që mund t’i kryejë Serbia nuk janë në përputhje me situatën aktuale dhe qëllimin e Vuçiqit.
Ai tha se NATO dhe KFOR-i nuk do ta lejojnë kurrë kthimin e ushtrisë serbe në Kosovë.
“Sipas Rezolutës 1244, personeli serb mund të lejohet të kryejë VETËM 4 funksione dhe ASNJË prej tyre nuk është në përputhje me situatën aktuale dhe qëllimin e z. Aleksandar Vuçiq, i cili e di mirë se NATO dhe KFOR-i nuk do ta autorizojë kurrë këtë!”, ka shkruar Grasso në Twitter.
Ai publikoi gjithashtu këtë pikë të rezolutës në të cilën thirret Serbia.
“Pas tërheqjes, një numër i rënë dakord i personelit jugosllav dhe serb do të lejohet të kthehet për t’i kryer funksionet e mëposhtme: Ndërlidhja me misionin civil ndërkombëtar dhe praninë ndërkombëtare të sigurisë; Shënimi/pastrimi i fushave të minuara; Mbajtja e një pranie në vendet e trashëgimisë; Mbajtja e pranisë në pikat kyçe kufitare”, thuhet aty.
Grasso këtë e bëri duke i replikuar gazetarit Besnik Velija, i cili kujtoi një moment nga viti 1999, kur komandanti gjerman, Helmut Harff i kishte dhënë ultimatum oficerit serb që për 30 minuta të largohen nga Kosova.
(Kosova Sot Online)
