Pas pezullimit të vendimit për faljen e 100 eurove çfarë po ndodhë me pagesat e tatimit në pronë!
Kryetari i Asociacionit të Komunave të Kosovës, Sazan Ibrahimi ka konfirmuar se pas vendimit të gjykatës, Kuvendet Komunale nuk mund të marrin vendime që lidhen me heqjen e 100 euro nga tatimi në pronë, transmeton gazeta “Kosova Sot Online”.
“Pas pezullimit të vendimit nga Kushtetuesja, Kuvendet Komunale nuk mund të marrin vendime ose të miratojnë faljen e 100 eurove tatim në pronë”, ka thënë ai
Lidhur me këtë çështje ka reaguar edhe deputeti i LDK-së, Avdullah Hoti.
Hoti tha se është duke ndodhur një kaos me pagesat e tatimit në pronë.
“Është duke ndodhur kaos me pagesat e tatimit në pronë. Masa e përkohshme, e vendosur nga Gjykata Kushtetuese, që e pezullon zbatimin e Ligjit Nr.08/L-224 lidhur me tatimin në pronë vlen deri më 30 nëntor 2023. Ndërkaq, sipas ligjit në fuqi Nr.06/L-005, më 30 shtator 2023 është afati i fundit për pagesën e këstit të dytë të tatimit në pronë. Me shumë të drejtë kemi kërkuar që faturat e rivlerësuara të tatimit në pronë të fillonin së zbatuari nga janari i vitit të ardhshëm. Arsyeja ishte e thjeshtë: u dyfishua barra tatimore për shumë qytetarë dhe biznese pa asnjë njoftim paraprak dhe kishte plot të meta sa i përket zonimit të lagjeve”, tha ai.
E vendimin e Kushtetueses e pati kritikuar ministri i Financave, Punës dhe Transfereve i Kosovës, Hekuran Murati.
Murati e cilësoi vendimin e Kushtetueses si “masë pezulluese për t’i mbrojtur komunat nga vetvetja”, në një shkrim në llogarinë e vet në Facebook.
“Madje për t’i shkuar ironisë deri në fund, paska pezulluar edhe vendimet që disa prej komunave tashmë i kanë marrë për faljen e një pjese të barrës tatimore. Krejt kjo në emër të parandalimit të ndërhyrjes në kompetenca të komunave…Pra po del ajo që pata paralajmëruar për gardën e vjetër, se qëllimin e kanë që të fshihen prapa Gjykatës Kushtetuese, se gjoja ata “do ta kishin miratuar zbritjen e tatimit, por ja që ligji është bllokuar në Gjykatë Kushtetuese”, shkroi Murati.
Më 4 shtator, Kushtetuesja e pranoi kërkesën e parashtruar nga Komuna e Prizrenit, duke vendosur masë të përkohshme deri në nëntor të vitit 2023 për nenin 5 të ligjit, derisa të merret një vendim përfundimtar.
Neni 5, veç tjerash, parashihte që çdo tatimpagues të kualifikohej për faljen e tatimit në pronë në vlerë prej 100 eurosh.
Kushtetuesja argumentoi se vendimi u mor bazuar në kompetencat vetanake të komunave, ku përfshihen edhe e drejta për mbledhjen e të ardhurave nga tatimet dhe shpenzimin e këtyre të hyrave sipas vendimit të vetë autoriteteve lokale.
“Për më tepër, vendosja e masës së përkohshme ndaj nenit 5 të ligjit të kontestuar, përkatësisht pezullimi i efekteve të tij deri në vendimmarrjen përfundimtare të Gjykatës, mundëson evitimin e cenimit të përgjegjësive komunale dhe zvogëlimit të të hyrave përkatëse komunale, në rast që Gjykata përmes vendimmarrjes përfundimtare konstaton që neni i lartcekur nuk është në përputhshmëri me Kushtetutën”, u tha në njoftimin e Gjykatës Kushtetuese.
Ligji për tatimin në pronë hyri në fuqi më 14 gusht.
Më herët gjatë këtij viti, kreu i Ministrisë të Financave, Punës dhe Transfereve, Hekuran Murati, kishte deklaruar se në bazë të ndryshimeve ligjore, 85 për qind e tatim-paguesve nuk do të paguanin asgjë për vitin 2023, 10 për qind të tjerë do të paguanin më pak se 100 euro dhe vetëm 5 për qind e tatimpaguesve do të paguanin më shumë se 100 euro.
(Kosova Sot Online)
