Vulin: Vuçiq nuk e ka refuzuar Putinin
Presidenti serb Aleksandar Vuçiq nuk e ka refuzuar ftesën e presidentit rus Vladimir Putin dhe ende nuk dihet nëse ai do të marrë pjesë në takimin e BRICS që do të mbahet në tetor në Kazan të Rusisë, transmeton gazeta “Kosova Sot Online”.
Kështu të paktën ka thënë njeriu që vet u takua me Putinin, Aleksandar Vulin.
Mediat serbe raportuan se Vuçiq e refuzoi ftesën e Putinit për të marrë pjesë në takimin e BRICS pasi presidenti serb tha të enjten se gjatë samitit, në të cilin ishte ftuar nga presidenti rus, në Beograd po vijnë mysafirë të rëndësishëm nga jashtë dhe se aktualisht nuk ka dëshiron të deklarojë pjesëmarrjen e tij në atë tubim.
“Kam marrë një ftesë 10-12 ditë më parë për t’iu bashkuar samitit të grupit BRICS më 23 dhe 24 tetor. Kemi mysafirë të rëndësishëm nga jashtë atëherë, por tani nuk do të flisja për këtë. Ngadalë kemi shumë vizita të rëndësishme dhe ardhjet dhe nisjet, ne do të flasim për këtë rreth 10 tetorit”, u tha Vuçiq gazetarëve gjatë një vizite në punimet në ndërtimin e autostradës Shabac-Loznicë.
Vuçiq falënderoi grupin BRICS dhe Putinin për ftesën, duke shtuar se në tetor do të shkojë edhe në Nju Jork, në seancën e Asamblesë së Përgjithshme të OKB-së.
Të enjten, Serbia u paralajmërua nga Bashkimi Evropian se duhet të përmbahet nga mbajtja dhe intensifikimi i marrëdhënieve me Moskën, sepse mbajtja e lidhjeve të ngushta me Rusinë nuk është në përputhje me parimet mbi të cilat bazohet procesi i anëtarësimit dhe anëtarësimi i mundshëm në BE.
Paralajmërimi erdhi pasi Vulin u takua me Putinin në Vladivostok të mërkurën, të cilit i tha se Serbia nuk është vetëm partneri strategjik i Rusisë, por edhe aleati i saj dhe se Beogradi nuk do të vendosë kurrë sanksione kundër Rusisë apo të bëhet anëtare e NATO-s.
Sot Vulin ishte i ftuar në emisionin e Radio Televizionit të Serbisë, duke iu përgjigjur pyetjes së një gazetari se si e komentoi vëmendjen e madhe që kishte shkaktuar takimi i tij me Putinin, veçanërisht në Kroaci, dhe tha se “kjo tregon se sa nervozë janë kroatët, sepse ata janë të vetëdijshëm se Serbia e bën politikën e saj të jashtme në mënyrë të pavarur, ndryshe nga ata”.
Vulin gjithashtu tha se Vuçiq nuk e ka refuzuar presidentin rus.
“Vuçiq nuk e ka refuzuar Putinin, nuk dihet ende…”
Por zëdhënësi i Komisionit të Politikës së Jashtme të BE-së, Peter Stano, tha të enjten se “nuk është plotësisht e sigurt” në emër të kujt Vulin po thotë atë që po thotë, duke pasur parasysh se Serbia ka aplikuar për anëtarësim në BE, po zhvillon negociatat e pranimit dhe presidenti dhe anëtarët e tjerë të qeverisë serbe përsërisin me këmbëngulje se anëtarësimi në BE është qëllimi strategjik i Serbisë.
Serbia është ende i vetmi vend kandidat që refuzon të përafrohet me politikën e jashtme të BE-së ndaj Rusisë, përfshirë sanksionet e vendosura kundër Moskës pas pushtimit të Ukrainës.
(Kosova Sot Online)
