Policia e Kosovës me aksion kundër drogës dhe krimeve kibernetike

Policia e Kosovës është duke zhvilluar një aksion në disa rajone të vendit kundër trafikimit me substanca narkotike dhe krimeve kibernetike, transmeton gazeta “Kosova Sot Online”.

Nga Policia e Kosovës kanë konfirmuar për media se aksioni po zhvillohet në një numër të konsiderueshëm lokacionesh.

“Pas një pune operative dhe hetimore, nga zyrtarët e Departamentit të Hetimeve të Policisë së Kosovës (PK), nën autorizimin e Prokurorisë Speciale të Republikës së Kosovës (PSRK), sot në orët e hershme të mëngjesit është realizuar një operacion i suksesshëm policor. Gjatë këtij operacioni policor janë kryer kontrolle në tri rajone të Kosovës që përfshijnë një numër të konsiderueshëm të lokacioneve të ndryshme, kundër trafikimit me narkotik dhe krimeve kibernetike”, ka thënë zëdhënësi i Policisë së Kosovës, Baki Kelani.

“Të gjitha veprimet e mëtejme do të ndërmerren në bashkëpunim dhe koordinim me organet e drejtësisë, ndërsa detajet tjera do të bëhen pas kompletimit të operacionit”, tha ai.

(Kosova Sot Online)