Trump: Votuesi duhet të identifikohet për çdo votë
Presidenti i SHBA-së, Donald Trump, tha të shtunën, më 30.08.2025, se do të lëshojë një urdhër ekzekutiv për të kërkuar identifikimin e votuesve nga çdo qytetar që voton, transmeton gazeta "Kosova Sot Online".
“Votuesi duhet të identifikohet për çdo votë. PA ASNJË PËRJASHTIM! Unë do të nxjerr një urdhër ekzekutiv për këtë qëllim!!!”- shkroi Trump në Truth Social.
“Gjithashtu, asnjë votim me postë, përveç atyre që janë shumë të sëmurë dhe ushtarëve që ndodhen larg” – shtoi ai.
Trump ka vënë prej kohësh në dyshim sistemin zgjedhor të SHBA-së dhe vazhdon të pretendojë gabimisht se humbja e tij ndaj presidentit demokrat Joe Biden në 2020 ishte rezultat i një mashtrimi të gjerë. Presidenti dhe aleatët e tij republikanë gjithashtu kanë bërë pretendime të pabaza për votim masiv nga joshtetas, gjë e cila është e paligjshme dhe rrallë ndodh.
Për vite me radhë, ai ka kërkuar gjithashtu heqjen e makinave elektronike të votimit, duke promovuar përdorimin e fletëve të votimit me letër dhe numërimin manual, një proces që zyrtarët zgjedhorë thonë se është i ngadaltë, i kushtueshëm dhe shumë më pak i saktë se numërimi me makinë.
(Kosova Sot Online)
