Trump paralajmëron publikimin e dosjeve sekrete
Presidenti i SHBA-së, Donald Trump, deklaroi sot se administrata e tij pritet të publikojë së shpejti dosjet qeveritare mbi objektet fluturuese të paidentifikuara, duke theksuar se do të bëhet publik “sa më shumë informacion i mundur”.
Ky njoftim vjen pas një direktive të lëshuar në muajin shkurt, e cila urdhëron agjencitë federale të nisin shqyrtimin dhe deklasifikimin e të dhënave që lidhen me UFO-t dhe mundësinë e jetës jashtëtokësore. Sipas administratës, ky hap synon t’i përgjigjet interesit të vazhdueshëm të publikut për këtë temë.
Trump u shpreh se procesi është në zhvillim dhe ka për qëllim rritjen e transparencës mbi materialet e klasifikuara më parë. “Ne do të publikojmë sa më shumë informacion të jetë e mundur”, tha ai, pa specifikuar një afat kohor për publikimin.
Rishikimi i këtyre dokumenteve u iniciua pasi Trump akuzoi ish-presidentin amerikan Barack Obama për ndarjen e informacionit të ndjeshëm, duke iu referuar komenteve të bëra nga Obama gjatë një podkasti, ku ai kishte diskutuar mbi ekzistencën e fenomeneve ajrore të pashpjegueshme.
(Kosova Sot Online)
