Lexoni edhe:
Adelina del në mbrojtje të Donikës: Kush do ta besonte që do të arrijnë në pikën ku do ta fyejnë Jusuf Gërvallën?
Ja kush thotë se ka zgjidhur misterin e 'Trekëndëshit të Bermudës'
Oqeanografi i Universitetit të Southamptonit, Simon Boxall, pretendon se ka zbuluar shpjegimin e zhdukjeve misterioze në Trekëndëshin e Bermudës, pa përfshirë teori për alienë apo portale ndërdimensionale.
Sipas tij, përgjegjëse janë valët gjigante – formacione ekstreme të ujit që mund të arrijnë deri në 30 metra lartësi dhe shfaqen papritur, duke qenë të afta të ndajnë anijet në dysh brenda pak minutash.
Në një dokumentar të Channel 5, Boxall shpjegon se Trekëndëshi i Bermudës është një “pikë e nxehtë” për këto valë, pasi stuhitë tropikale që formohen rreth Bahamas shpesh bashkohen dhe përqendrojnë energjinë në një drejtim të vetëm. Ky fenomen, thotë ai, mund të jetë arsyeja e disa rrënojave të gjetura në rajon.
Megjithatë, jo të gjithë shkencëtarët pajtohen me këtë interpretim. Disa argumentojnë se numri i mbytjeve dhe rrëzimeve të aeroplanëve në këtë zonë është brenda kufijve normalë për rajonet oqeanike të botës. Administrata Kombëtare Oqeanografike dhe Atmosferike (NOAA) dhe kompania e sigurimeve Lloyds e Londrës kanë deklaruar se statistikat nuk tregojnë më shumë humbje në Trekëndëshin e Bermudës sesa në pjesë të tjera të oqeanit.
Trekëndëshi i Bermudës, i formuar nga Miami, Bermuda dhe Porto Riko, është prej dekadash një burim teorish, legjendash dhe frymëzim për filma. Por, pavarësisht reputacionit të tij si “zona e misterit”, mijëra anije e aeroplanë kalojnë aty çdo ditë pa u përballur me incidente.
(Kosova Sot Online)
