Studim: Ilaçi i cermës mund ta shkurtojë kohën e qëndrimit në spital të pacientëve me Covid-19

  • G.G /
  • 05 shkurt 2021 - 08:45
Studim: Ilaçi i cermës mund ta shkurtojë kohën e qëndrimit në spital të pacientëve me Covid-19

Një ilaç i lirë, që normalisht përdoret për ta trajtuar cermën ka mundësi që në mënyrë të konsiderueshme ta pakësojë kohën e qëndrimit në spital të pacientëve me Covid-19 dhe nevojën për oksigjen.

Studimi i ri për ilaçin e quajtur colchicine, i kryer në Brazil, erdhi pasi një testim ndërkombëtar i publikuar të mërkurën tregoi se kjo substancë e pakëson numrin e hospitalizimeve dhe vdekjeve në mesin e pacientëve me Covid-19 për më shumë se 20 për qind.

Colchicine, që përdoret për trajtimin e sëmundjeve reumatike, u vlerësua nga hulumtuesit si ilaç me potencial për të qenë substanca e parë orale që mund ta trajtojë Covidin, shkruan The Guardian.

Sipas testimit të fundit, të financuar nga disa fondacione dhe nga autoritetet braziliane, kjo substancë mund ta lehtësojë reagimin inflamator të trupit dhe mund të ndihmojë shmangien e dëmtimit të qelizave që e formojnë murin e enëve të gjakut.

Shkencëtarët thanë se përdorimi i këtij ilaçi nuk ka qenë i lidhur me efekte anësore serioze, si dëmtimi i zemrës apo mëlçisë apo dëmtimi i sistemit imunitar.

(Kosova Sot Online)