Autoritetet në Britani japin “dritën jeshile”, miratohet pilula e parë anti-Covid

Rregullatorët në Britani i dhanë miratimin ilaçit eksperimental molnupiravir nga gjigandi farmaceutik amerikan Merck të enjten, duke shënuar autorizimin e parë nga një organ i shëndetit publik për një trajtim oral antiviral për Covid-19 tek të rriturit.

Ekspertët thonë se nëse autorizohet gjerësisht, molnupiravir mund të ketë potencial të madh për të ndihmuar në luftimin e pandemisë: Pilulat janë më të lehta për t’u marrë, prodhuar dhe ruajtur, duke i bërë ato veçanërisht të dobishme në vendet me të ardhura të ulëta deri në mesatare me infrastrukturë më të dobët dhe furnizime të kufizuara vaksinash.

“Ne do të vazhdojmë të lëvizim me ashpërsi dhe urgjencë për të sjellë molnupiravir te pacientët në mbarë botën sa më shpejt të jetë e mundur”, tha në një deklaratë presidenti i Merck, Robert M. Davis.

Kompania ka aplikuar në Administratën e Ushqimit dhe Barnave të SHBA-së për autorizimin e përdorimit urgjent, ndërsa Agjencia Evropiane e Barnave ka nisur një rishikim të vazhdueshëm të ilaçit oral antiviral. Ata thanë se po punojnë gjithashtu për të dorëzuar aplikime tek agjencitë e tjera rregullatore.

Një provë klinike globale tregoi se pilula reduktoi shtrimet në spital dhe vdekjet me gati gjysmën në mesin e pacientëve të rritur me koronavirus me rrezik më të lartë të diagnostikuar me sëmundje të lehtë deri në mesatare, tha muajin e kaluar Merck – e cila ka punuar në ilaç me partnerin Ridgeback Biotherapeutics. Doza e parë që iu dha një vullnetari në provë u administrua në Mbretërinë e Bashkuar.

(Kosova Sot Online)