Lexoni edhe:
Violeta kërkon përjashtimin e këtij banori pasi ia sulmoi verbalisht djalin: Bullizim i pastër
Ja kur ndodh një reaksion alergjik
Një reaksion alergjik ndodh kur sistemi imunitar bëhet tepër i ndjeshëm ndaj ushqimeve, polenit, medikamenteve, helmit të bletëve dhe substancave të tjera. Ekspozimi ndaj këtyre alergjenëve mund të shkaktojë ënjtje, urtikarie (puçrra alergjike) dhe simptoma të tjera, transmeton gazeta "Kosova Sot Online".
Një substancë që shkakton një reaksion alergjik quhet alergen. Shumë alergjenë janë substanca të përditshme që janë të padëmshme për shumicën e njerëzve. Megjithatë, çdo gjë mund të jetë alergen nëse sistemi imunitar ka një lloj reagimi të dëmshëm ndaj saj.
Një nga rolet e sistemit imunitar është shkatërrimi i substancave të dëmshme në trup. Nëse një person ka alergji ndaj një substance, sistemi i tij imunitar do të reagojë sikur ajo substancë të ishte e rrezikshme dhe do të përpiqet ta shkatërrojë atë. Alergjitë zhvillohen kur sistemi imunitar reagon në mënyrë të tepruar ndaj substancave që zakonisht janë të padëmshme.
Herën e parë që një person ekspozohet ndaj një alergjeni, zakonisht nuk përjeton një reagim. Shpesh nevojitet kohë që sistemi imunitar të zhvillojë ndjeshmëri ndaj asaj substance.
Me kalimin e kohës, sistemi imunitar mëson ta njohë dhe ta mbajë mend alergjenin. Ndërsa ndodh kjo, ai fillon të prodhojë antitrupa për ta sulmuar atë sa herë që ndodh ekspozimi. Ky proces quhet sensibilizim.
Disa alergji janë sezonale. Për shembull, simptomat e etheve të barit (alergjia nga poleni) mund të jenë më të forta midis muajve prill dhe maj, kur niveli i polenit të pemëve dhe barit në ajër është më i lartë. Një person mund të përjetojë reagime më të rënda ndërsa rritet sasia e polenit.
Një reaksion alergjik shkakton inflamacion dhe irritim. Megjithatë, simptomat specifike varen nga lloji i alergjenit. Reaksionet alergjike mund të shfaqen në traktin tretës, lëkurë, sinuse, rrugë të frymëmarrjes, sy ose pasazhe nazale.
(Kosova Sot Online)
