Adnan Januzaj e bën ‘horë’ shokun e skuadrës
Ylli i Real Sociedadit, Adnan Januzaj, e ka publikuar një video në llogarinë e tij në Instagram, ku ai shihet duke ia futur në mes të këmbëve topin një bashkëlojtari të tij.
Skuadra e Real Sociedadit u bashkua sot në kampin stërvitor “Campo de Futbol Zubieta”, për t’u përgatitur për përballjen me Valladolidin, e cila do të zhvillohet të dielën në kuadër të La Ligës.
Adnan Januzaj i shfrytëzoi këto stërvitje për t’iu treguar të gjithëve pikërisht se me çfarë do të përballen lojtarët e Valladolidit. Megjithatë, këtë herë, viktimë e Januzajt ishte bashkëlojtari i tij, Diego Llorente.
Përfaqësuesi belg me prejardhje nga Kosova e publikoi në llogarinë e tij në rrjetin social videon ku ai shihet duke e dribluar dhe duke ia futur topin në mes të këmbëve Llorentes.
“Më vjen keq vëlla @diego_2llorente”, shkruhet në përshkrimin e videos, të publikuar nga Januzaj, i cili e përcjelli këtë shkrim me disa emotikone që simbolizojnë qeshjen.
Mirëpo, Januzaj e ka pasur mundësinë ta dëshmojë veten edhe në fushën e lojës. Ai i ka bërë gjithsej 21 paraqitje këtë sezon për Real Sociedadin, gjatë së cilave i shënoi dy gola dhe i bëri katër asiste.
(Kosova Sot)