Bastorja e famshme angleze i frikësohet Rashicës e Zenelit
Kosova mund të jetë klubi me rangimin më të dobët nga grupi, i ka disa futbollistë në skuadër të cilët i kanë lënë mjaft shumë përshtypje bastores së famshme sportive, Bet365.
Kosova do të përballet me Anglinë fillimisht më 9 tetor, e pastaj skuadra e Gareth Southgate do të vijë në stadiumin “Fadil Vokrri”, më 17 nëntor.
Këto dy ndeshje do të jenë të vlefshme për Grupin A në kuadër të kualifikimeve për EURO 2020. Në këtë grup janë edhe Bullgaria, Republika Çeke dhe Mali i Zi.
Edhe pse për Anglinë konsiderohet se do ta ketë shumë të lehtë ta sigurojë kualifikimin nga ky grup, bastorja britanike Bet365 beson se trajneri i Anglisë, Gareth Southgate, ka arsye për t’u frikësuar nga “Dardanët”.
“Duke menduar se si dreqin do ta ndalësh Arbër Zenelin e Milot Rashicën *dy herë*”, shkruan llogaria zyrtare e Bet365, në përshkrimin e një fotografie të Gareth Southgate.
Anësori Arbër Zeneli i ka 14 asiste dhe gjashtë gola gjatë paraqitjeve të këtij sezoni. Disa prej tyre ai i ka bërë për klubin Heerenveen, para se të transferohej në Reims në janar.
Ndërsa, anësori tjetër i Kosovës, Milot Rashica ka qenë në superformë gjatë kohës së fundit për klubin gjerman. Ai i ka shënuar pesë gola dhe e ka asistuar një tjetër në katër ndeshjet e fundit.
(Kosova Sot)