Flet Rashica pas superparaqitjes kundër Bayernit
Milot Rashica e ka shfrytëzuar llogarinë e tij në rrjetin social Instagram, për ta komentuar eliminimin e Werder Bremenit nga Kupa e Gjermanisë. Në këtë ndeshje, kundër Bayern Munichut, Rashica e pati një superparaqitje.
Dy gola të sulmuesit polak Robert Lewandowski dhe një nga Thomas Muller i mjaftuan skuadrës së Niko Kovacit të fitojë 3:2, ndaj Werder Bremenit të mërkurën në gjysmëfinale të Kupës së Gjermanisë.
Edhe pse skuadra e tij u eliminua nga kjo garë, ylli i Kombëtares së Kosovës, Milot Rashica, shkëlqeu në këtë ndeshje. Për paraqitjen e tij, ai u vlerësua me notën më të lartë nga të gjithë lojtarët në fushë.
24-vjeçari së pari asistoi për Yuto Osake në minutën e 74-të dhe vetëm një minutë më vonë, ai shënoi një supergol individual duke e barazuar rezultatin në 2:2.
Ky ishte goli i tretë në katër ndeshje në Kupën e Gjermanisë për Rashicën, mirëpo nuk mjaftoi që t’ia sigurojë Bremenit një vend në finale.
“Fatkeqësisht nuk mjaftoi, por ne vazhdojmë së bashku. Mbështetje e mrekullueshme nga tifozët tanë #MR11”, shkroi Rashica në llogarinë e tij në Instagram.
Bayern Munich do të përballet me RB Leipzig në finale të Kupës së Gjermanisë.
(Kosova Sot)