Dëmtohet statuja e Kosovare Asllanit në Suedi

Kosovare Asllani u nderua me statujë në Suedi para fillimit të Kampionatit Botëror të Vajzave, që po zhvillohet në Francë. Megjithatë, tani është zbuluar se statuja e saj u dëmtua gjatë fundjavës së kaluar.

Katër nga yjet e Kombëtares së Suedisë u nderuan me nga një statujë në vendlindjen e tyre para se të fillonte Kampionati Botëror i Vajzave. Njëra ndër këto vajza është edhe Kosovare Asllani.

Asllanit iu ndërtua statuja për shkak të karrierës së saj të jashtëzakonshme me Kombëtaren e Suedisë. Statuja e saj u vendos pikërisht në fushën që e mban emrin e Asllanit, në Bullerbyn të Suedisë.

Megjithatë, dy ndër statujat e ndërtuara tashmë janë ndërtuar. Fillimisht u dëmtua statuja e Nilla Fischer, e vendosur në Linkoping, ndërsa fundjavën e kaluar u dëmtua edhe statuja e Asllanit.

Krahu i majtë i statujës së futbollistes me nofkën “Kosses” është thyer, ndërsa fotografitë e publikuara nga mediat suedeze tregojnë se mirëmbajtësit e “Asllani Court” tentuan ta kthejnë atë në gjendjen e mëparshme duke e ngjitur krahun në trupin e statujës sërish. Ende nuk dihet nëse dëmtimi ishte i qëllimshëm.

Asllani ka shkëlqyer në ndeshjet e zhvilluara deri më tani të Suedisë në Kampionatin Botëror. Ajo ka shënuar gol në dy prej këtyre ndeshjeve, në të cilat e fitoi edhe çmimin për lojtaren më të mirë të ndeshjes. 

 

(Kosova Sot Online)