Federata e Anglisë kërkon nga UEFA ndëshkimin e Bullgarisë
Federata e Futbollit e Anglisë ka bërë thirrje që UEFA ta fillojë një hetim urgjent ndaj Bullgarisë, pasi që tifozët e këtyre të fundit bënë thirrje raciste ndaj lojtarëve me ngjyrë të “Tre Luanëve” gjatë ndeshjes së mbrëmshme, në kuadër të kualifikimeve për EURO 2020.
Përballja e djeshme në Sofje u ndal në dy raste gjatë pjesës së parë, pasi që tifozët e Bullgarisë në tribuna po i ofendonin futbollistët me ngjyrë të Anglisë me thirrje raciste.
Protokolli i ri i UEFA-s thekson se gjyqtarët e kanë autoritetin për ta suspenduar ndeshjen dhe në fund mund të vendosin ta braktisin plotësisht ndeshjen në rrethana të tilla.
Dy hapat e parë të një plani trehapësh u implementuan mbrëmë në kryeqytetin bullgar, pasi që tifozëve fillimisht iu kërkua ndalja e thirrjeve raciste e pastaj ndeshja u pezullua sërish për pak kohë.
Në fund u mor vendimi për të mos e braktisur ndeshjen, që përfundoi me rezultat 6:0 për anglezët, mirëpo një numër i tifozëve bullgarë u larguan nga stadiumi me forcë nga rojet e sigurimit.
Megjithatë, tani pritet që Bullgaria të përballet me një dënim nga UEFA për incidentet e ndeshjes së mbrëmshme, pasi që edhe vetë Federata e Anglisë ka kërkuar që shtëpia e futbollit evropian të nisë hetime urgjente.
“Ne mund ta konfirmojnë se lojtarët e Anglisë ishin cak i thirrjeve të neveritshme raciste gjatë ndeshjes kualifikuese për EURO 2020 kundër Bullgarisë”, thuhet në postimin në faqen zyrtare të Federatës angleze në Twitter.
“Kjo është e papranueshme në çfarëdo niveli të sportit tonë dhe përqendrimi ynë i menjëhershëm është t’i mbështetin futbollistin dhe stafin e përfshirë në këtë incident”.
“Fatkeqësisht, siç jemi të vetëdijshëm, kjo nuk është hera e parë që futbollistët tanë janë përballur me abuzim të tillë dhe nuk ka vend për sjellje të tillë në shoqëri, e lëre më në futboll”.
“Ne do t’i kërkojmë UEFA-s ta hetojë këtë rast me urgjencë”.
As we are sadly aware, this is not the first time our players have been subjected to this level of abuse and there is no place for this kind of behaviour in society, let alone in football.
— The FA (@FA) October 14, 2019
We will be asking @UEFA to investigate as a matter of urgency.
Presidenti i Federatës bullgare, Borislav Mihaylov, tha dje se ai i konsideronte akuzat ofenduese dhe poshtëruese, duke shtuar se kritikat në drejtim të tifozëve bullgarë ishin të padrejta.
Edhe trajneri i ekipit kombëtar, Krasimir Balakov, më vonë pretendoi se nuk kishte dëgjuar asnjë thirrje raciste nga ana e tifozëve bullgarë dhe shtoi se kishin qenë tifozët e Anglisë ata që kishin shfaqur “sjellje të pahijshme”.
Megjithatë, tani ka ndërhyrë kryeministri i Bullgarisë, Bokyo Borisov, i cili ka kërkuar ndryshim, duke e paralajmëruar Federatën e Futbollit vendore se nuk do të marrë asnjë financim deri në momentin kur disa figura të caktuara të largohen nga hierarkia.
Ministri i Sportit i Bullgarisë, Krasen Kralev, tha: “Para pak kohësh, kryeministri më thirri urgjentisht. Ju e dini se gjatë katër vjetëve të fundit, qeveria ka bërë shumë për ta zhvilluar futbollin bullgar”.
“Por, pas ngjarjeve të fundit, duke e pasur parasysh situatën e plotë të futbollit, kryeministri më ka urdhëruar që nga sot t’i suspendojë të gjitha lidhjet me Federatës, përfshirë këtu ato financiare, deri në dorëheqjen e Borislav Mihaylovit”.
(Kosova Sot Online)