Spanja planifikon kthimin e Luis Enriques, Moreno ndihet i tradhtuar

Federata e Futbollit e Spanjës pritet ta konfirmojë kthimin e Luis Enriques në pozitën e trajnerit të Kombëtares spanjolle të martën, pasi që presidenti Luis Rubiales do të flasë para mediave.

Presidenti i Federatës së Futbollit të Spanjës, Luis Enrique, pritet të flasë para gazetarëve të martës, përderisa Spanja është duke u përgatitur për ta riemëruar Luis Enriquen në postin e trajnerit, në vend të Robert Morenos, shkruan AS.

Pasi fillimisht kishte qenë ndihmëstrajner i Spanjës nën Luis Enriquen, Moreno e mori postin në mars, fillimisht si ushtrues detyre, pasi ish-trajneri i Barcelonës mësoi se vajza e tij, që vdiq në gusht, ishte e sëmurë.

Moreno ndihet “i shfrytëzuar dhe i tradhtuar” nga Federata spanjolle dhe Luis Enrique

Burimet e AS, të afërta me Morenon, thonë se ai ndihet i përdorur dhe i tradhtuar nga Enrique dhe Rubiales, i cili pritet ta informojë largimin e Morenos nga posti i trajnerit gjatë orëve në vijim, para se ta japë një sqarim më të gjerë në një konferencë për shtyp.

Pasi që e kishte marrë vesh për shkarkimin e tij të hënën, Moreno nuk u paraqit për konferencën për shtyp pas fitores 5:0 të Spanjës kundër Rumanisë, që ia siguroi Spanjës kualifikimin në EURO si fituese e Grupit F.

42-vjeçari thuhet se nuk kishte qenë në gjendje të përshtatshme për t’u përballur me mediat në Wanda Metropolitano. Ai kishte qenë shumë i emocionuar në fjalimin e tij në zhveshtore, kur u tregoi lojtarëve se koha e tij në Kombëtare po merrte fund.

Drejtuesit e Federatës spanjolle po e humbnin besimin në menaxhimin e Morenos

Pasi arriti t’i sigurojë tri fitore nga po aq ndeshje si trajner i përkohshëm, Moreno i ka arritur katër fitore dhe dy barazime që kur u emërua trajner permanent i Spanjës në qershor.

Por, pasi që dera e kthimit kishte mbetur gjithnjë e hapur për Luis Enriquen, i cili ia bëri të qartë Rubialesit se është i hapur ndaj idesë së kthimit – Federata spanjolle kishte planifikuar të presë deri pas miqësoreve të marsit kundër Holandës dhe Gjermanisë për ta marrë një vendim.

Megjithatë, drejtuesit e Federatës besohet se u ka humbur besimi në menaxhimin e Morenos. 

(Kosova Sot Online)