Zbulohen datat e rikthimit të Champions e Europa League
UEFA do të bisedojë të martën me 55 Federata dhe do të vendosë edhe zyrtarisht për datat e këtyre dy kompeticioneve. Por, mediat e huaja ndërkohë i kanë nxjerrë opsionet e mundshme të datave
UEFA do të diskutojë të martën me drejtuesit e 55 Federatave anëtare të saj për Ligën e Kampionëve dhe Ligën e Evropës.
Sipas mediave të huaja, shtëpia e futbollit evropian po planifikon t’i rikthejë këto dy kompeticione në muajin gusht.
Championsi dhe Europa League janë ndalur më shumë se një muaj më parë shkaku i pandemisë koronavirus.
UEFA po e konsideron opsionin ku Championsi do të rikthehej më 7 e 8 gusht.
Natyrisht, ky institucion shpreson që deri në atë kohë ligat vendore ta kenë mbyllur sezonin.
Java e parë e gushtit do ta kompletonte të tetën e finales.
Në javën e dytë do të fillonte çerekfinalja.
Formati do të mbetet i njëjti me vajtje-ardhje deri në finale.
Çerekfinalja do të luhej më 11 e 12 dhe 14 e 15 gusht.
Kurse, gjysmëfinalja më 18 e 19 dhe 21 e 22 gusht.
Ndërkaq, finalja do të zhvillohen në Stamboll më 29 gusht.
Si rezultat i kësaj, sezoni 2020/2021 i Ligës së Kampionëve do të fillonte në tetor të këtij viti.
Plani i njëjtë është edhe për Ligën e Evropës, pra ndeshjet vajtje-ardhje të luhen çdo tri ditë.
E teta e finales të kompletohet më 2 e 3 gusht dhe finalja të zhvillohet më 27 gusht.
(Kosova Sot Online)