Agjenti i Hakimit zbulon të ardhmen e futbollistit

  • 29 maj 2020 - 08:29
Agjenti i Hakimit zbulon të ardhmen e futbollistit

I huazuari në Borussia Dortmund, Achraf Hakimi, synon të luajë për Real Madridin. Këtë lajm e ka konfirmuar agjenti i futbollistit, Alejandro Camano.

Achraf Hakimi ka ngjallur interesim te shumë klube të mëdha të Evropës falë paraqitjeve të tij me Borussia Dortmundin gjatë këtyre dy sezoneve i huazuar në Gjermani, ku së shpejti i përfundon kontrata e huazimit.

Mbrojtësi anësor 21-vjeçar, i cili u ngrit nga akademia e Real Madridit dhe debutoi për ekipin e parë në vitin 2017, ka ngjallur interesim te klube si Bayern Munich, Paris Saint-Germain, Juventus dhe Chelsea.

Interi raportohet gjithashtu se është ndër klubet që po e kërkon më së shumti transferimin e Hakimit, megjithatë agjenti i futbollistit, Camano, e sheh të ardhmen e Hakimit vetëm në Santiago Bernabeu.

“Ai do të kthehet në Real Madrid kur të përfundojë sezoni. Do ta shohim se çfarë do të ndodhë më pastaj. Ai dëshiron të luajë në ndeshje, si këtë sezon, kur ka qenë titullar në çdo ndeshje. Frymëzimi i tij i vetëm është të zhvillohet si lojtar”, ka thënë Camano.

“Kemi dialog të mrekullueshëm me Real Madridin dhe ata gjithmonë llogarisin në të për ta pasur në radar dhe ne nuk duam ta distancojmë veten nga ata shumë. Kështu që do të arrijmë ndonjë lloj marrëveshje, por pa harruar që qëllimi i tij është të luajë për Real Madridin ndonjë ditë sepse e cilëson si klubin më të mirë në botë”.

(Kosova Sot Online )