Leart Paqarada publikon foto nga protestat në SHBA, përkrah luftën kundër racizmit
Protestat në Shtetet e Bashkuara të Amerikës kundër racizmit dhe brutalitetit policor kanë mbuluar ballinat e mediave të mëdha botërore, por edhe profilet e sportistëve të ndryshme në rrjete sociale. Në mesin e personave të shumtë që po shprehin përkrahje për protestuesit në SHBA është edhe mbrojtësi anësor i Kosovës, Leart Paqarada.
I riu amerikan me ngjyrë, George Floyd, vdiq javën e kaluar në Minneapolis pasi Derek Chauvin, një polic i bardhë, i cili ia mbajti gjurin mbi qafë për më shumë sesa tetë minuta.
Chauvin, i cili u shkarkua nga detyra si polic të martën, u arrestua të premten dhe ndaj tij u ngrit akuzë për vrasje të rangut të tretë.
Vdekja e Floyd ka ngjallur protesta gjatë gjithë javës së kaluar në Shtetet e Bashkuara të Amerikës, të cilat kanë vazhduar edhe këtë javë.
Protestuesit po kërkojnë që të arrestohen edhe tre policët e tjerë që ishin në vendin e ngjarjes dhe që nuk kishin ndërhyrë për ta ndalur kolegun e tyre, Chauvin.
E përkrahje për këto protesta kundër racizmit dhe brutalitetit policor kanë shprehur sportistë të shumtë edhe nga jashtë SHBA-ja, në mesin e të cilëve është edhe ylli i Kosovës dhe Sandhausen, Leart Paqarada.
Paqarada e postoi një kolazh të fotografive nga protestat në SHBA, të cilat përçojnë mesazhet: “Jeta e njerëzve me ngjyrë ka rëndësi”, “A e ka djali im radhën?”, “A jam unë i radhës?”
(Kosova Sot Online)
