Chelsea – Liverpool: Luftë për të mbetur në garë për titull, Lukaku as në stol

Pasi kërcënuan me një garë trifrontëshe për titull në Premierligë këtë sezon bashkë me kampionin në fuqi Manchester City, Chelsea dhe Liverpooli e gjejnë veten buzë daljes jashtë garës.

Chelsea e pret Liverpoolin në Stamford Bridge për derbin e javës së 21-të, që nis në orën 17:30.

City e ka krijuar një epërsi prej 11 pikëve në krye të tabelës ndaj Chelseat dhe prej 12 pikëve ndaj Liverpoolit tashmë, megjithëse të kaltrit e kanë një ndeshje më pak të zhvilluar dhe të kuqtë dy më pak.

Kushdo që mposhtet sonte në Londër rrezikon të mbetet përfundimisht jashtë garës për titull.

Chelsea i ka fituar vetëm dy prej pesë ndeshjeve të fundit, duke barazuar në tri të tjerat.

Liverpooli është pa fitore në dy ndeshjet e fundit, pas barazimit me Tottenhamin dhe humbjes ndaj Leicesterit.

Trajneri i klubit londinez Thomas Tuchel e ka lënë Romelu Lukakun jashtë ekipit për ndeshjen e sotme, pas intervistës së belgut me Sky Sports, në të cilën ai shprehu palumturinë me gjendjen e vet në Chelsea dhe dëshiron për t’u kthyer në Inter.

Alisson Becker, Roberto Firmino dhe Joel Matip mungojnë për ekipin e Jurgen Kloppit, pasi dolën pozitivë në testin për Covid-19, pak para ndeshjes.

(Kosova Sot Online)