Pas rizgjedhjes së Agim Ademit kryetar, FFK nis procedurat disiplinore ndaj kritikuesve te tij

A.P /
12 April 2022 - 17:22

Pas rizgjedhjes së Agim Ademit si kryetar të Federatës së Futbollit të Kosovës në një Kuvend Zgjedhor mjaft kontrovers, të cilësuar si joligjor dhe jostatutor edhe nga Departamenti i Sportit i MKRS-së, Komisioni i Garave i kësaj federate ka hapur procedura disiplinore ndaj ish-sekretarit të përgjithshëm, Eroll Salihut, dhe dy prej zyrtarëve të klubeve nga Superliga e Kosovës.

Bashkë me Salihun, në disiplinore kanë përfunduar edhe drejtori sportiv i Dritës, Valon Zymberi dhe drejtori sportiv i Drenicës, Taulant Dajaku

Sipas njoftimit të lëshuar nga FFK, inicimet disiplinore ndaj tre të lartpërmendurve janë të bazuara në xhirime televizive.

Salihu, Zymberi e Dajaku në emisionet sportive ishin deklaruar haptazi kundër Kuvendit Zgjedhor të mbajtur më 6 prill, teksa përfaqësuesit e klubeve të Dritës dhe Drenicës kishin përkrahur Gramoz Vokrrin, i cili nuk ia arriti të futet në garën kundër Ademit.

Njoftimi nga faqja zyrtare e FFK-së:

“Inicime disiplinore:

Ndaj: Përfaqësuesit të lartë ligjor të FFK-së, Eroll Salihu. MOTIVI: Në prononcimin për media shpif, nënçmon, dezinformon dhe diskrediton organet e FFK-së dhe ato të UEFA-s. Sipas xhirime televizive.

Ndaj: Drejtorit sportiv të FC ”Drita” Valon Zymberi. MOTIVI: Në prononcimin për media akuzon, dezinformon dhe ofendon organet e FFK-së. Sipas xhirime televizive.

Ndaj: Drejtorit sportiv të FC ”Drenica”, Taulant Dajaku. MOTIVI: Në prononcimin për media akuzon, dezinformon dhe ofendon organet e FFK-së. Sipas xhirime televizive”.

(Kosova Sot Online)