Edhe një premtim për heqjen e Parkut të Paqes në Mitrovicë
Edhe një premtim për heqjen e barrikadës mbi lumin Ibër që ndanë Mitrovicën në veri e jug. Kryetari i kësaj të fundit tha se në tetor do të filloj së zbatuari një projekt i cili e laron Parkun e Paqes ndërsa krijon mundësinë e lëvizjes së lirë.
Parku i Paqes në Mitrovicë mund t’i ketë ditët e numëruara. Kështu thotë Kryetari i Mitrovicës Agim Bahtiri, i cili ishte pjesë e delegacionit kosovar në bisedimet e Brukselit që kishin në fokus urën e Ibrit.
“Më 1 tetor do të pastrohet ura dhe do të shpallet tenderi për projektin i cili ne jemi pajtuar që të fillon”, tha Bahtiri për Klan Kosova.
Bahtiri dha pak detaje se si do të duket ura pas kësaj date.
“Ura e Ibrit do të jetë urë e lirshme për të gjithë qytetarët dhe do të jetë e lirë edhe për automjete”, tha ai.
Numri 1 i jugut nuk nguroi të tregoi se ai dhe pjesëtarët e tjerë të palës kosovare kundërshtuan edhe diçka nga plani i Brukselit për urën.
Nënshkrimi i marrëveshjes për urën e Ibrit pritet të bëhet në takimin e ardhshëm të nivelit të lartë në Bruksel.