Veseli: Bisedova me Fajonin për hapat e mëtutjeshëm për heqjen e vizave

Kryeparlamentari Kadri Veseli ka njoftuar për një bisedë telefonike që ka zhvilluar me Raportuesen për Kosovën në Parlamentin Evropian, Tanja Fajon.

Sipas Veselit me eurodeputeten Fajon kanë diskutuar për hapat e mëtutjeshëm deri në vendimin final për heqjen e vizave. 

"Në një bisedë telefonike, falënderova eurodeputeten Tanja Fajon për mbështetjen e vazhdueshme në procesin e liberalizimit të vizave për qytetarët e Kosovës. Me Raportuesen për Kosovën në Parlamentin Europian folëm për hapat e mëtutjeshëm drejt vendimit final për heqjen e vizave. Presim që deri në fund të muajit gusht, Komisioni LIBE ta miratojë rekomandimin për vizat, për ta proceduar menjëherë në Parlamentin Europian, në mënyrë që deri në fund të vitit qytetarët tanë të lëvizin lirshëm në Zonën Schengen”, ka shkruar Veseli.

(Kosova Sot)