Shpendi ua kthen “borxhin” Devollëve me tender (Dokument)
Komuna e Prishtinës e udhëhequr nga “Vetëvendosje”, i ka dhënë këtë vit dy tenderë kompanisë Devolli, në vlerën 63 mijë euro.
Devolli kishte financuar partinë e Shpend Ahmetit në vitin 2010, sikurse edhe kishte furnizuar me jogurt Vetëvendosjen në vitin 2013.
Përveç këtij bashkëpunimi, “Vetëvendosje” në vazhdimësi kishte kritikuar kompaninë e vëllezërve Shkëlqim e Blerim Devolli, lidhur me procesin e privatizimit dhe lidhjet e saj me njerëzit e politikës.
Megjithatë, kritikuesit e kompanisë së fuqishme nga Peja të hënën shpallën fituese pikërisht atë për t`i furnizuar me qumësht nxënësit e shkollave të Prishtinës.
Komuna e VV e shpërbleu Devollin në mesin e 4 operatorëve ofertues. Vlera mujore e kontratës për “Furnizimi me qumësht për nxënësit e shkollave – niveli i ulët prej klasës se I–V” është 40 mijë e 761 euro.
Edhe në muajin qershor komuna e Shpend Ahmetit ia besoi “Furnizimin me qumësht UHT për Arkivin Komunal dhe Brigaden e Zjarrëfikësve”, kompanisë Devolli. Vlera e kontratës është 22 mijë e 568 euro.
Kompania e vëllezërve Devolli, ka pasur historik të bashkëpunimit me partinë e Shpend Ahmetit “Fryma e Re” kur ajo u fut në politikë. Në zgjedhjet e përgjithshme të nëntorit të 2010-ës, Devolli kishte financuar FER-in me shumën 5 mijë euro.
Devolli Group e cila ka financuar shumicën e partive politike në Kosovë, në dhjetor të vitit 2013 ka furnizuar me jogurt edhe “Vetëvendosjen”.
Kritikat e VV ndaj Devollit
Në janar të vitit 2014 deputetët e parlamentit kishin miratuar rekomandimet e “Vetëvendosjes” për ngritjen e një komisioni hetimor dhe për auditimin e tërësishëm të privatizimit të Fabrikës së Amortizatorëve, të blerë nga Devolli Group.
Visar Ymeri, shefi i Grupit Parlamentar të “Vetëvendosjes” në legjislaturën e kaluar, pati deklaruar se AKP-ja kishte shpallur fituese kompaninë Devolli Group, pa e verifikuar mirë historikun e saj.
Kompania, sipas tij, atëkohë ishte nën hetime, por që kjo nuk e kishte penguar AKP-në që ta shpallte fituese në këtë proces privatizimi, raporton gazeta Fjala.
Me gjithë zhurmën e bërë në Kuvend për këtë çështje, asnjëherë nuk është dalë me një raport lidhur me të gjeturat e komisionit hetimor për përfshirjen e vëllezërve Devolli në afera të kundërligjshme gjatë procesit të privatizimit të fabrikës së Amortizatorëve.