Flamuri shqiptar në Preshevë e Bujanovc acaron serbët

Ngritja e flamurit të Shqipërisë në komunat e Preshevës dhe Bujanovcit nga kryetarët e tyre, Shqipërim dhe Nagip Arifi, ka ngjallur reagime në mediat serbe.

Novosti në raportimin e saj mbi këtë akt të dy kryetarëve shqiptarë me rastin e Ditës së Flamurit, thekson se ata do të gjobiten në bazë të ligjeve serbe, të cilat ndalojnë vendosjen e stemës apo flamurit të një shteti të huaj në godinat shtetërore të Republikës së Serbisë, përveçse rasteve kur kjo lejohet në bazë të ndonjë traktati ndërkombëtar.

Komuna e Preshevës ngre flamurin kuqezi, kryetari Arifi tregon sa gjobitet nga Serbia për këtë veprim

Diçka të tillë e paralajmëroi ditën e djeshme nga studio e “Ditarit” në A2CNN, kryetari i Preshevës Shqiprim Arifi, duke thënë se pavarësisht gjobave, ai nuk ka ndalur ngritjen e flamurit që kur ka ardhur në krye të këtij institucioni.

“De facto është shkelje e ligjit në Serbi. Çdo vit kemi marrë një gjobë mes 1 mijë e 1500 euro është gjobë personale. Unë dënohem si Shqipërim, jo si kryetar. Përkundrazi është motivacion se ne mbijetojmë në ato troje shqiptare. Qëkur unë jam zgjedhur kryetar i Luginës e kam vendosur flamurin. Ne nuk kemi pse të turpërohemi. Ne na kanë sulmuar, na kanë masakruar, flamuri ynë është paqësor. Nuk kemi hyrë në pronat e huaja në Serbi apo tjetër kund. Ne e bëjmë në mënyrë të hapur. Me siguri ka procedurë derisa të më vijë gjoba, është e pritshme se ligjet i kanë formuar ashtu. Por është dhe mendësi që ekziston në Serbi që i shikon shqiptarët si njerëz të klasës së dytë.”

Ndërkohë, Bujanovačke raporton se flamujt janë ngritur mbrëmjen e së hënës, pak para se dy drejtuesit e të dyja komunave të udhëtonin në drejtim të Tiranës për të festuar festën kombëtare, transmeton a2 përcjell albinfo

Sipas tyre, ndryshe nga vitet e kaluara kur kryetari i komunës së Bujanocit Nagip Arifi personalisht e vendoste flamurin e Shqipërisë në ballkonin e ndërtesës së komunës, në 111 Vjetorin e Pavarësisë nderin e ka patur Nevzad Lutfiu, ish-këshilltar në Kuvendin Komunal të qytetit.

Për shkak të vendosjes së flamurit shqiptar, policia prej vitesh ka ngritur kallëzime ndaj krerëve të komunave, zyrtarëve dhe drejtorëve të institucioneve publike, të cilët janë dënuar për shkelje të nenit 41, paragrafi 1, pika 3, të Ligjit për pamjen, përdorimin e stemës, flamurit dhe himnit të Republikës së Serbisë.

Ligji parashikon se personi juridik dënohet me gjobë prej 50.000 deri në 500.000 dinarë për kundërvajtjen e kryer.

Sipas ligjit për pakicat kombëtare, komuniteteve u lejohet të përdorin simbole kombëtare, por jo identike me simbolet e shtetit amë.

(Kosova Sot Online)