Remi ishte dënuar në Kosovë për krime lufte - çfarë thuhej në aktakuzë? - Lajme - Kosova Sot
Remi ishte dënuar në Kosovë për krime lufte - çfarë thuhej në aktakuzë?

Remi ishte dënuar në Kosovë për krime lufte - çfarë thuhej në aktakuzë?

Ish-oficerë të lartë të Ushtrisë Çlirimtare të Kosovës, UÇK, të Zonës Operative të Llapit, përfshirë edhe komandantin e Zonës, Rrustem Mustafën, i njohur me nofkën “Remi”, ishin dënuar më 2013 nga Gjykata e Prishtinës për krime lufte

Komandant “Remi” ishte pjesë e të ashtuquajturit “Grupi i Llapit” që po gjykohej prej vitesh për krimet e pretenduara të luftës.

Gjykata Themelore e Prishtinës i kishte gjetur fajtorë dhe i kishte dënuar me burgim tre eprorët e lartë të UÇK-së: Latif Gashin, i njohur si “Lata”, udhëheqës i shërbimit informativ ushtarak, Rrustem Mustafën, i njohur si Remi, komandant i Zonës së Llapit dhe Nazif Mehmetin, ish-ushtrues detyre i komandantit të Policisë Ushtarake.

Latif Gashi për pikën tetë të aktakuzës e cila pikë e ngarkonte atë për rrahje dhe tortura në qendrën e ndalimit në Llapashticë ishte shpallur fajtor dhe ishte dënuar me 5 vjet burgim.

Gashi ishte i dënuar më parë edhe nga Gjykata e Qarkut në Prishtinë në vitin 2009 për pikat 5 dhe 14 të aktakuzës së njëjtë, me nga 2 vjet për secilën vepër.

Gjykata Themelore në Prishtinë, të pandehurit Latif Gashi i kishte unifikuar të dy dënimet dhe i kishte shqiptuar dënimin prej 6 vjetësh burg.

Pika 5 e aktakuzës ngarkonte Gashin dhe të tjerët se “nga tetori 1998 deri në prill 1999 në bashkëkryerje kanë urdhëruar dhe kanë marrë pjesë në themelimin dhe vazhdimin e trajtimit çnjerëzor të civilëve shqiptarë të Kosovës, të paraburgosur në qendrën e paraburgimit në Llapashticë.

Sipas kësaj pike, Gashi dhe të pandehurit tjerë kanë mbajtur civilët në kushte çnjerëzore duke i privuar nga higjiena, uji, ushqimi dhe trajtimi i nevojshëm mjekësor.

Pika 14 e akuzonte Gashin se “nga 2 gushti deri në fund të shtatorit 1998 ka urdhëruar dhe marrë pjesë në rrahjen dhe torturimin e një rojtari serb të pyllit, i cili ka qenë i ndaluar në qendrën e ndalimit në Bajgorë”.

Sipas aktakuzës kjo është bërë në tentim që ai të detyrohet të pranojë se ka kryer veprime kundër UÇK-së ose të japë informata për inteligjencën.

Nazif Mehmeti për pikën tetë të aktakuzës ishte dënuar më 7 qershor 2013 me 3 vjet burg. Ndërsa më parë edhe ky i pandehur ishte i dënuar nga ish Gjykata e Qarkut në Prishtinë me 1 vit e 6 muaj qëndrim prapa grilave. Nazif Mehmeti mori një dënim unik prej 3 vjetësh burgim.

Rrustem Mustafa, i njohur si Remi, ishte shpallur fajtor për pikën tetë të aktakuzës dhe ishte dënuar me burgim prej 4 vjetësh. Mustafa ishte dënuar edhe nga ish-Gjykata e Qarkut me dënim prej 2 vjetësh, lidhur me pikën 5 të aktakuzës.

Në qershor 2013, Mustafa kishte marrër një dënim të përgjithshëm nga gjykata prej 4 vjetësh burg.

Ndërsa, Gjykata e Apelit, në të cilën ishin ankuar këta të dënuar, kishte shpallur vendimin më 11 gusht 2015.

Sipas këtij vendimi, i pandehuri Latif Gashi do ta vuajë dënimin unik prej 6 vjet burgim, i pandehuri Nazif Mehmeti do ta vuajë dënimin unik prej 3 vjet burgim, ndërsa i pandehuri Rrustem Mustafa do ta vuajë dënimin unik prej 4 vjet burgim, raporton kallxo.com.

Gjatë ditës së sotme, avokati i komandant “Remit” bëri të ditur se klienti i tij është ftuar nga Zyra e Prokurorit të Specializuar në Hagë për një “intervistë”.

Sipas avokatit Arianit Koci, Rrustem Mustafa do të paraqitet vullnetarisht në Hagë në muajin janar.

Avokati nuk ka bërë të ditur se për çfarë do të intervistohet komandant “Remi”.

Gjykata Speciale në Hagë është themeluar me ligj të miratuar nga Kuvendi i Kosovës.

Ajo pritet të gjykojë krime të pretenduara të luftës, për të cilat dyshohet se i kanë kryer ish-pjesëtarë të UÇK-së. 

(Kosova Sot)

21 orë e 18 minuta më parë
13/12/18