Mustafa flet me zyrtarët e lartë britanikë për zgjedhjet e parakohshme

Kryetari i Lidhjes Demokratike të Kosovës, Isa Mustafa, ka mirëpritur delegacionin e Zyrës së Jashtme të Britanisë, të përbërë nga Shefi i Departamentit për Ballkanin Perëndimor, Andrew Page dhe Susan Laffey, Zyrtare e Lartë e Sektorit të Analizës, si dhe Ambasadorin Ruairi O’Connell.

“Gjatë takimit u diskutua për situatën aktuale në vend, dialogun Kosovë-Serbi, zgjedhjet e parakohshme në Kosovë, zgjedhjet e brendshme të LDK-së dhe programin zhvillimor të LDK-së në qeverinë e ardhshme në fushat e ekonomisë, arsimit, shëndetësisë, etj”, thuhet në një njoftim nga LDK’ja.

Siç bën të ditur njoftimi, Mustafa e falënderoi delegacionin britanik për kontributin dhe përkrahjen e Britanisë së Bashkuar dhe ambasadës së saj në Kosovë gjatë të gjitha proceseve shtetformuese në Kosovë këto tri dekadat e fundit.

(Kosova Sot Online)