Zgjedhjet, vjen kërkesa për Albin Kurtin dhe Isa Mustafën

Zgjedhjet e 6 tetorit në Kosovë bënë kthesë historike në politikën e Kosovës, ku fituese doli Lëvizja Vetëvendosje, e pasura nga LDK, PDK, koalicioni AAK-PSD dhe koalicioni Nisma-AKR që nuk e kaloi pragun zgjedhor.

Votuesi në këto zgjedhje është vetëdijesuar, ku afër 60% e votuesve në këto zgjedhje i thanë "JO" pushtetit që ishte që nga paslufta në Kosovë.

E sipas analistëve, sovrani i tha jo gjeneratës së politikanëve të vjetër dhe të shpenzuar politikisht, e cila sipas analistëve, do të nxjerrë shumë shpejtë jashtë loje këta politikan të vjetër, të cilët do të zëvendësohen me gjenerata të reja të politikanëve të rinj.

E në lidhje me këtë temë për "Kosova Sot Online", foli analisti, Dardan Grapci, sipas të cilit këto zgjedhje treguan se populli nuk fle, por ndëshkon me votë. 

"Me zgjedhjet e 6 tetorit u vërtetua se populli më në fund u zgjua nga gjumi, dhe i votuan partitë opozitare, ku ata të cilët e kanë udhëheq shtetin thuajse për 20 vite, më në fund u larguan nga pozitat e larta dhe u shkëputen nga krimi i organizuar", tha Grapci për "Kosova Sot Online".

Tutje, ai tha se krijimi i qeverisë së re nga Lëvizja Vetëvendosje dhe Lidhja Demokratike e Kosovës, nuk pritet të sjellë ndonjë ndryshim.

"Edhe me krijimin e Qeverisë së re në mes të LVV-së dhe LDK-së nuk do të kemi ndryshime duke e ditur që këto dy parti janë si dita me natën. Kurti nuk po i pranon simbolet e Republikës së Kosovës, nuk po e pranon flamurin, himnin e etj, dhe çka do që ka të bëj me Kosovën, nga ana tjetër LDK-ja do të ketë probleme me LVV-në duke e ditur që Isa Mustafa nuk do lëshon pe pa e marrë ndonjë hise për vete. Prandaj për tu rregulluar dhe funksionuar këto dy parti - Isa Mustafa dhe Albin Kurti duhet ta lëshojnë frontin, kurse LVV dhe LDK të vazhdojnë qeverisjen e Kosovës deri në vitin 2022 kur edhe do të mbahen zgjedhjet Presidenciale", përfundoi Grapci për "Kosova Sot Online".

(Kosova Sot Online)