Delegacioni gjerman me mesazhe të prera për Vetëvendosjen dhe LDK-në
Pas takimit me kreun e VV’së Albin Kurtin dhe liderin e LDK’së Isa Mustafën, dy anëtarët e Bundestagut gjerman, Peter Beyer dhe Christian Schmidt kanë folur para gazetarëve në një konferencë për media.
Deputeti gjerman: VV e LDK të mos krijojnë martesë dashurie, është koha për Qeveri stabile
Schmidt ka thënë se koha të cilën e kanë zgjedhur për të ardhur në Kosovë është shumë e rëndësishme, e se kjo javë është vendimtare për shtetin.
“Koha të cilën kemi zgjedhur që ta vizitojmë Kosovën mendojmë se është shumë e rëndësishme. Edhe pse edhe në Berlin kemi përgjegjësi të tjera.
Ne pas zgjedhjeve parlamentare që u mbajtën në Kosovë, mendojmë se kjo është java vendimtare për vendin tuaj, pikërisht për faktin se periudha të cilën po e nisim tani, është e rëndësishme edhe për krijimin e qeverisë.
Prandaj, për ne është jashtëzakonisht në interes tonin që të bëjmë të qartë që për qeverinë e Gjermanisë zhvillimi në Kosovë është me rëndësi të madhe dhe perspektiva e Kosovës në integrimin evropian gjithashtu”, thotë ai.
Tutje, i njëjti shton se për zhvillimet në Kosovë është e interesuar edhe kancelarja gjermane, Angela Merkel e cila do të informohet për zhvillimet në vend.
“Unë vi nga partia që është edhe pjesë e Partive Popullore Evropiane dhe edhe nga ky aspekt ka qenë kjo vizitë me interes që të zhvillohet në Kosovë, nga ana tjetër jam edhe kryesues i Grupit tim parlamentar, me këtë rast, presidenti Tusk më ka lutur mua që të vi në Kosovë për t’u informuar rreth zhvillimeve aktuale, këtë vizitë e kemi ndërmarrë bashkë me kolegun tim z. Beyer dhe pas së cilës kur të kthemi në Berlin do ta informojmë edhe kancelaren Merkel, e cila interesohet për këtë vizitë. Ne nuk jemi këtu për t’i zhvilluar bisedimet për krijimin e koalicionit”, shton ai.
Deputeti gjerman ka njoftuar se ka pasur takime me krerët e LDK’së dhe VV’së.
“Megjithatë, ne kemi zhvilluar sot takime me partnerët tanë të LDK’së dhe janë edhe persona që ne i njohim, jemi takuar me Isa Mustafën dhe Vjosa Osmanin, dhe e njëjta gjë vlen edhe për kontaktet sa i përket z.Albin Kurtit, që po ashtu nuk e kemi takuar për herë të parë në Kosovë, por, në rrethana konkrete e kemi takuar edhe atë.
Për sa i përket takimit me përfaqësues të tjerë, ka të bëjë vetëm ekskluzivisht me terminët tona agjendën e ngjeshur, faktin që s’mundëm ta takojmë z. Kryeministër, i cili po ashtu është i interesuar për vizitën tonë”, shton ai, derisa, ka përmendur edhe integrimin e Kosovës.
“Për sa i përket temave që prekin politikën e jashtme ne do të kishim disa udhëzime, kjo ka të bëjë së pari me atë që ne rrugën e Kosovës për integrimin evropian nuk e shohim që të jetë me e lehtë, në qoftë se vazhdojmë të flasim për shkëmbim territorial, përkundrazi mendojmë se kjo çështje është jashtëzakonisht e rrezikshme”, thotë ai.
Sa i përket bisedimeve për koalicion mes VV e LDK’së, ai ka thënë se nuk është e thënë që të krijohet një martesë dashurie, por, që të ndërtohet një bashkëpunim.
“Në këtë rast nuk është e thënë që të krijohet një martesë dashurie, ndërsa për ta ilustruar vetëm pak këtë që e thashë, njëri nga presidentët e Gjermanisë, nëse e don vendin e tij, ai ka thënë e dua gruan time, prandaj ajo që dua të them është se nuk duhet të krijohen lidhje dashurie, ajo që ka rëndësi është që të ketë besim në mes të palëve, kjo është serioze dhe megjithatë do të kisha pasur një rekomandim, marrë parasysh edhe përvojën time, ekziston një rregull e artë. Më duhet ta them, në coftë se bisedimet për koalicione, për formim janë në vazhdim e sipër, rregulla është që mikrofoni dhe jo telefoni.
Dhe e dimë duke e ditur se z.Kurti është sot në Romë, rregulla që vlen në Vatikan, derisa njerëzit janë të mbyllur nuk duhet folur”, thotë ai, teksa shton se duhet të krijohet një qeveri stabile.
“Ne me ata të cilën kemi biseduar jemi të gjithë të të njejtit mendim, që për një vend që sapo ka dalur nga zgjedhjet parlamentare është e rëndësishme që të ketë një qeveri stabile, e që të mos ketë lojëra taktike, dhe mendoj që modeli Spanjoll nuk është për t’u imituar. Më e rëndësishme në politikë është që të kihet besim.
Ka mbetur edhe një javë kohë deri në konstituimin e parlamenti, që do të thotë se nuk ka shumë kohë, megjithatë pritja jonë është meqenëse këtë e kemi ndjerë gjatë bisedave që kemi zhvilluar, kur bisedojnë me njëri tjetrin atëherë mund edhe të gjendet zgjidhja.
Dhe ne këtë e kemi ndjerë te të dyja grupet me të cilat kemi biseduar se ka një përkushtim nga të dyja anët”, ka shtuar tutje.
Beyer thirrje për LDK-në e VV-në: Mos komunikoni përmes mediave, thirreni një takim e bëjeni koalicionin
Deputeti i partisë së kancelares gjermane Merkel, Peter Beyer, ka thënë se marrëveshja ndërmjet Lidhjes Demokratike të Kosovës dhe Lëvizjes Vetëvendosje nuk duhet të dështojë për shkak të detajeve teknike.
Beyer ka thënë se palët duhet të kuptojnë rëndësinë e përgjegjësisë që kanë marrë pas zgjedhjeve të 6 tetorit.
“Gëzohem shumë që jam këtu në Kosovë. Jemi këtu bashkë për herë të dytë brenda vitit. Kemi pasur takime me përfaqësues të dy partive. Mund të konfirmoj që pritjet tona janë që të gjithë partitë të kuptojnë rëndësinë e përgjegjësisë që kanë pas zgjedhjeve të 6 tetorit, të formojnë një qeveri stabile”, ka thënë Beyer.
Tutje ai ka thënë se 26 dhjetori tashmë është një limit kohor se deri kur mund të arrihet marrëveshja, megjithatë ka specifikuar se nuk janë në Kosovë për të ndërhyrë mes negociatave që po bëhen mes dy partive.
“Kur e them këtë, koha ka shumë rëndësi. 26 dhjetori ka vendosur një limit kohor. Ajo çfarë ne po bëjmë është që nuk po ndërhyjmë brenda negociatave të koalicionit, nuk është qëllimi ynë. Por erdhëm për të dëgjuar rreth bisedimeve që po bëhen. Një gjë që duhet kuptuar që negociatat për koalicion kanë mbërritur një pikë, që të gjithë duhet kuptuar që nuk duhet humbur kohë me detaje teknike. Duhet shikuar në sy njeri tjetrin, pasi që besimi është esenca. Duhet besuar njëri tjetrin dhe nuk duhet humbur në detaje teknike. Koalicioni ka ardhur në një pikë që ata nuk duhet të prishin këtë vullnet në detaje teknike”, ka thënë Beyer.
Sipas tij, nëse ka vullnet atëherë palët nuk duhet të ngecin në detaje teknike. Beyer ka thënë se palët që thërrasin njëra tjetrën për një takim dhe të përfundojnë marrëveshjen për bashkëqeverisje.
“Nëse është ky vullnet politik mes dy partive për të formuar qeverinë për të mirën e qytetarëve të Kosovës atëherë nuk duhet të ngecin në detaje teknike dhe duhet t’i besojnë njëra tjetrës.Thirrni njëra tjetrën caktojeni një datë të bisedimeve dhe përfundoni marrëveshjen e koalicionit”, ka shtuar tutje Beyer.
Deputeti gjerman ka thënë se gjithashtu presin që mos të ketë ndërhyrje nga jashtë të cilat kanë për qëllim futjen e përçarjes në mes të LDK’së dhe Vetëvendosjes.
Sipas tij tashmë dy partitë nuk duhet të flasin para mediave, por që të thërrasin njëra-tjetrën për takimin e radhës dhe ta përfundojnë kolaicionin.
“Pritjet tona janë që askush nuk duhet të provojë të ndajë palët për të ndërtuar qeverinë. Ky është mesazhi. Gjithashtu pritjet tona janë, që palët te jenë të relaksuara, të mos flasim për media, por të thërrasin njëra tjetrën në telefon dhe të caktojnë një takim”, ka shtuar tutje Beyer.
(Kosova Sot Online)
