Grabisnin shtëpitë e braktisura pas tërmetit, arrestohen 3 persona

Një 42-vjeçar me iniciale L. T., u kap në flagrancë duke vjedhur në një pallat në lagjen nr. 17 në Durrës, të cilit i ishin larguar banorët.

Pas vlerësimeve të specializuara, pallati në fjalë ishte shpallur nga ekspertët i pabanueshëm, arsye që i detyroi familjarët të braktisnin shtëpitë. Ju kujtojmë se lagjja në fjalë ishte ndër më të prekurat sa i takon lëkundjeve të fuqishme të 26 nëntorit.

“Si rezultat i kontrolleve të shtuara, nga shërbimet e Komisariatit të Policisë Durrës u arrestua në flagrancë shtetasi L. T., 42 vjeç, banues në Durrës, pasi u kap në flagrancë duke vjedhur në një pallat në lagjen nr. 17, Durrës”, njofton policia.

Po ashtu dy të rinj janë vënë në pranga nga policia e Krujës, teksa ishin përgatitur për të kryer vjedhje.

Pas informacionit të marrë në rrugë operative se dy të rinj nga Shkodra, të cilët ishin duke qarkulluar me një automjet do kryenin vjedhje në zonën e Krujës, shërbimet e Policisë kanë bërë bllokimin e automjetit dhe të dy të rinjve që ndodheshin në të.

Nga kontrolli i ushtruar në brendësi të automjetit, Policia gjeti dhe sekuestroi mjete që shërbenin për hapjen e dyerve të banesave dhe të automjeteve, doreza e pajisje të tjera që do shërbenin për të realizuar vjedhjet. Në përfundim të veprimeve të para u bë arrestimi në flagrancë  i drejtuesit të automjetit, shtetasit  E. R., 25 vjeç, banues në lagjen Dobrac, Shkodër, i dënuar më parë dhe i pasagjerit shtetasit N. P., 23 vjeç,  banues në Shkodër.

Materialet në ngarkim të shtetasve të mësipërm do t’i kalojnë Prokurorisë, për veprat penale “Vjedhja” dhe “Sigurimi i mjeteve për vjedhje”, në bashkëpunim.

(Kosova Sot Online)