Skandali i dhunës zbulon se kopshti “Cambridge Kids” nuk ka licencë për punë

Çerdhja “Cambridge kids”, e cila pasditen e së martës, u bë lajm për shkak të dhunës së një prej edukatoreve të ushtruar ndaj një fëmije 2 vjeç, rrezikon të mbyllet.

Zyrtarë të Ministrisë së Arsimit kanë konfirmuar për media se çerdhja “Cambridge kids” në Prishtinë nuk ka licencë. 

Madje, ata thonë se ky institucion edukativ nuk ka aplikuar kurrë për një të tillë.

E në raste të tilla, institucioni mbyllet menjëherë.

“Ministria mund të kërkojë ndërprerjen e veprimtarisë edukative”, ka thënë MASHT-i për media.

Skandali u zbulua nga nëna e fëmijës që shihet në video.

Ajo ka publikuar pamjet e kapura nga kamerat e kopshtit, në të cilat duket qartë se edukatorja Teuta Gashi ushtron dhunë ndaj fëmijës, i cili refuzon të ulet në karrocë.

(Kosova Sot Online)