Infermierët ftojnë anëtarët e Qeverisë që të qëndrojnë 18 minuta në kujdestari
Sindikata e infermierëve, mamive dhe profesionistëve të tjerë shëndetësorë ka përfunduar protestën.
Në fund të protestës ata në mënyrë simbolike dorëzuan në Qeveri 18 mantile dhe i kanë ftuar 18 anëtarë të Qeverisë që të qëndrojnë 18 minuta në kujdestari.
Kryetari i Sindikatës, Fitim Havolli ka kërkuar nga institucionet rritje të pagesës së ndërrimit të natës qind për qind.
Havolli ka thënë se kjo është më e pakta që mund të bëhet, krahasuar me rrezikun për infektim me Covid-19 të cilit i nënshtrohen ky komunitet.
Në sektorin publik, paga mujore e mjekut është rreth 600 euro në muaj, derisa infermierët për punën e tyre paguhen me rreth 400 euro.
Rritja e pagave për punëtorët shëndetësorë ishte paraparë që të bëhej përmes Ligjit për paga. Por, Gjykata Kushtetuese e Kosovës, më 30 qershor, tha se ky ligj kishte elemente jokushtetuese. Ky vendim i Kushtetueses u tha se do të demotivojë profesionistët shëndetësorë të Kosovës.
(Kosova Sot Online)