Avokati i Salih Mustafës paralajmëron mocione kundër Gjykatës Speciale

  • A.P /
  • 28 shtator 2020 - 17:19
Avokati i Salih Mustafës paralajmëron mocione kundër Gjykatës Speciale

Julius Von Boné, avokat i ish-eprorit të Ushtrisë Çlirimtare të Kosovës (UÇK), Salih Mustafës ka bërë një paralajmërim të madh në seancën e parë gjyqësore të Tribunalit Special të Hagës. Ai ka thënë se mund ta sfidojnë Gjykatën Sepciale si institucion të drejtësisë dhe mënyrën e funksionimit të saj.

Në fjalën e tij para gjyqtarit të kësaj seance, Nicolas Guillou, avokati Von Boné ka thënë se nuk e përjashtojnë mundësinë që të dorëzojnë mocione, përmes të cilave do të synojnë ta kundërshtojnë juridiksionin dhe ligjshmërinë e Gjykatës Speciale, raporton Gazeta Express.

Lexo Edhe:

Pak ditë pas spektaklit te veteranët, Veliu pret në takim shefin e EULEX’it

Siç ka theksuar ai, fakti që sot bashkë me klientin e tij u paraqit në seancën e parë të këtij tribunali, nuk do të thotë se e pranojnë gjykatën si të tillë.

“Mbrojtja në këtë moment nuk e përjashton mundësinë e dorëzimt të mocioneve të cilat kundërshtojnë juridiksionin apo legalitetin, ligjshmërinë e gjykatës. Dhe fakti që jemi këtu sot nuk do të thotë që mbrojtja e pranon gjykatën si të tillë. Por këtë do ta bëjmë me kalimin e kohës përmes mocioneve tona”, ka thënë avokati Julius Von Boné.

Ai ka dhënë edhe vërejtje tjera, duke theksuar se ish-shefi i Inteligjencës në Forcën e Sigurisë së Kosovës, Salih Mustafa, ende nuk e ka parë aktakuzën e plotë, të paredaktuar, kundër tij.

“Klienti im ka marrë vetëm versionin e redaktuar të aktakuzës. Nuk e di pse janë redaktuar apo kush është përmendur në versionin e redaktuar. Kur të jetë e disponueshme na duhet. Sigurisht të gjitha këto janë shumë të reja për klientin tim, do t’i duhet njëfarë kohe për t’u përshtatur”, ka thënë avokati mbrojtës nga Rotterdami.

Salih Mustafa u arrestua javën e kaluar në Kosovë dhe u dërgua në Dhomat e Specializuara në Hagë me katër akuza që rëndojnë mbi të për vepra që pretendohet se janë kryer gjatë luftës, duke përfshirë vrasje dhe tortura.

Anëtarët e Organizatës së Veteranëve të Luftës së UÇK-së, përfshirë këtu edhe kryetarin e saj, Hysni Gucatin dhe nënkryetarin Nasim Haradinaj që u arrestuan të premten, kanë deklaruar vazhdimisht se nuk e njohin Gjykatën Speciale, duke e cilësuar si gjykatë etnike.

(Kosova Sot Online)